સાવરકુંડલાની ધરતી પર સેવાનો ત્રિવેણી સંગમ. મહાત્મા ગાંધી અને લલ્લુભાઈ શેઠની પુણ્યતિથિએ ભાવવંદના

​આજે જ્યારે સમગ્ર દેશ રાષ્ટ્રપિતા મહાત્મા ગાંધીને તેમની પુણ્યતિથિએ નમન કરી રહ્યો છે, ત્યારે સાવરકુંડલાવાસીઓ માટે આજનો દિવસ બેવડી આસ્થાનો દિવસ છે. સત્ય અને અહિંસાના પૂજારી ગાંધીજીની સાથે સાથે, સાવરકુંડલાની અનોખી ધરોહર અને સેવાના પર્યાય સમાન સ્વ. લલ્લુભાઈ મોતીચંદ શેઠની પુણ્યતિથિ પણ આજે જ છે.​નોટ પર છબી અને અંતરમાં સ્થાન કેવો અનોખો સંયોગ. ​વિશ્વ જેને અહિંસાના માર્ગદર્શક માને છે તેવા ગાંધીજીની પ્રતિકૃતિ આજે રિઝર્વ બેંક ઓફ ઇન્ડિયા દ્વારા બહાર પાડવામાં આવતી ચલણી નોટો પર સુશોભિત છે. અને વિશ્ર્વના લગભગ કોઈ ખૂણો બાકી નહીં હોય જ્યાં મહાત્મા ગાંધીજીની પ્રતિમા ન હોય? બીજી તરફ, સાવરકુંડલાના પનોતા પુત્ર એવા લલ્લુભાઈ શેઠની છબી અહીંના લોકોના હૃદયમાં કોતરાયેલી છે. તેમણે કંડારેલી સેવાની કેડી આજે પણ વટવૃક્ષ બનીને અનેક જરૂરિયાતમંદોને છાંયડો આપી રહી છે.

​જ્યાં ‘કેશબારી’ નથી, માત્ર ‘સેવાબારી’ છે

​લલ્લુભાઈ શેઠના સેવાકીય વારસાને જીવંત રાખતું ‘શ્રી લલ્લુભાઈ શેઠ આરોગ્ય મંદિર’ (વિદ્યાગુરુ ફાઉન્ડેશન સંચાલિત) આજે સમગ્ર દેશમાં આરોગ્ય સેવાનું અનન્ય ઉદાહરણ પૂરું પાડે છે. આ હોસ્પિટલની સૌથી મોટી વિશેષતા એ છે કે અહીં કોઈ કેશબારી જ નથી.

​દર્દીઓ માટે તમામ સારવાર તદ્દન વિનામૂલ્યે.

​નિષ્ણાંત તબીબો દ્વારા અત્યાધુનિક સેવાઓ.

​માનવતા અને કરુણાના ભાવ સાથેની સારવાર.

આમ ગાંધીજીના વિચારોને શ્રી લલ્લુભાઈ શેઠે અનુસરી તેમના વિચારોનો ​સેવાકીય મૂલ્યોનો વારસો સાવરકુંડલા શહેરને અર્પણ કરવામાં આવ્યો છે. ત્યારે ​આજના આ વિશેષ દિવસે સાવરકુંડલાના નગરજનો આ બંને મહાત્માઓને અંજલિ આપી રહ્યા છે. ગાંધીજીએ ગ્રામોત્થાન અને સેવાના જે આદર્શો આપ્યા, તેને સાચા અર્થમાં ચરિતાર્થ કરવાનું કામ સ્વ. લલ્લુભાઈ શેઠ અને તેમના દ્વારા સ્થાપિત સંસ્થાઓ કરી રહી છે. એક તરફ ચલણી નોટો પરની ગાંધીજીની આકૃતિ દેશના અર્થતંત્રને ગતિ આપે છે, તો બીજી તરફ શ્રી લલ્લુભાઈ શેઠ આરોગ્ય મંદિર સમાજના વંચિત વર્ગોને નવજીવન આપી રહ્યું છે.​આમ, આજે સાવરકુંડલાની આ પવિત્ર ભૂમિ પર રાષ્ટ્રપિતા અને માનવતાના મસીહા બંનેનો સંગમ જોવા મળી રહ્યો છે. શ્રી લલ્લુભાઈ શેઠ આરોગ્ય મંદિરના પ્રમુખ હરેશભાઈ મહેતા સુપ્રિટેન્ડેન્ટ શ્રી ડો પ્રકાશ કટારીયા તથા સમગ્ર કર્મચારીગણ સંસ્થાના ટ્રસ્ટીઓનાં માર્ગદર્શન હેઠળ પ. પૂ. મોરારીબાપુના આશીર્વાદ સાથે દર્દી નારાયણની નિશુલ્ક સસ્મિત સેવાભાવ એ જ સ્વ. લલ્લુભાઈ શેઠને અર્પણ કરવામાં આવતી સાચી શ્રધ્ધાંજલી ગણાય.