રાજ્યમાં આગામી ત્રણ દિવસ બાદ ગરમી વધશેઆગામી ૫ દિવસ ગુજરાતમાં ૩૫ કિલોમીટરની ઝડપે પવન ફુંકાવવાની શક્યતા

ગુજરાતમાં સતત વાતાવરણમાં આવી રહ્યો છે બદલાવ. સતત થઈ રહ્યો છે બેવડી ઋતુનો અનુભવ. વહેલી સવારે અને સાંજ ઠંડી લાગે છે જ્યારે બપોર દરમિયાન આકરી ગરમીનો અહેસાસ થાય છે. આ સ્થિતિની વચ્ચે થઈ છે એક ખતકનાક આગાહી. આગામી દિવસોમાં ગુજરાત પર કોપાયમાન થઈ શકે છે પવન દેવ. રાજ્યમાં આગામી ત્રણ દિવસ બાદ ગરમી વધશે પરંતુ બીજી તરફ વાહનની રફતારની ગતિએ ફૂંકાશે પવન. હવામાન અંગે કરાયેલાં અનુમાન મુજબ આગામી દિવસમાં ગુજરાતમાં ૩૫ કિલોમીટરની ઝડપે પવન ફુંકાવવાની શક્યતા વર્તાઈ રહી છે. ભારે પવનને કારણે વાહન ચાલકોને મોટી હાલાકીનો સામનો કરવો પડશે. સાથે જ કાચા મકાનોને પણ ખતરો ઉભો થશે. એમાંય જાે સાવ હલકા છાપરા હશે મકાન પર તો એ હવામાં પણ ઉડી શકે છે.

આ અમે નથી કહી રહ્યાં આ દિશા તરફ ઈશારો કરી રહી છે હવામાનની આગાહી. આગાહી એવી કરવામાં આવી છેકે, આગામી દિવસોમાં ગુજરાતના વિવિધ વિસ્તારોમાં ભારે પવન ફૂંકાશે. લગભગ ૩૫ કિલો મીટરની આસપાસ પવનની ગતિ રહેશે. ખાસ કરીને આગામી ત્રણ દિવસ બાદ રાજ્યભરના મહત્તમ તાપમાનમાં ૨-૩ ડિગ્રી જેટલો વધારો થઈ શકે છે. તેની સાથે જ લઘુતમ તાપમાનમાં પણ વધારો થતા ગરમીનું પ્રમાણ વધે એવી શક્યતા છે. ઉત્તર અને દક્ષિણ ગુજરાતના ભાગોમાં ઉત્તર પશ્ચિમી અને ઉત્તર દિશા તરફથી પવનની ગતિ રહેશે તથા ઉત્તર ગુજરાતના ભાગોમાં ૨૫થી ૩૫ કિલોમીટર પ્રતિ કલાકની ઝડપે પવન ફૂંકાય એવી શક્યતા છે.

તદુપરાંત અમદાવાદ અને આસપાસના જિલ્લાઓમાં પવનની દિશા ઉત્તર પૂર્વ અને ઉત્તર દિશા તરફથી રહેશે. હવામાન વિભાગ દ્વારા આવનાર દિવસોમાં તાપમાનમાં વધારો થવાની આગાહી કરવામાં આવી છે. હવામાન વિભાગ દ્વારા આગામી ૫ દિવસને લઈને ગુજરાતના વાતાવરણ વિશે આગાહી કરતા જણાવવામાં આવ્યું હતું કે, આગામી ૫ દિવસ દરમિયાન રાજ્યનું વાતાવરણ એકદમ સુકું રહેશે તથા વરસાદની કોઈ આગાહી નથી. સતત વેસ્ટર્ન ડિસ્ટર્બન્સની અસર રહેશે પરંતુ, તેને કારણે કમોસમી વરસાદની આગાહી નથી. હવામાન વિભાગ દ્વારા છેલ્લા ૨૪ કલાકમાં રાજ્યભરના લઘુતમ અને મહત્તમ તાપમાન વિશે જાણીએ તો અમદાવાદમાં છેલ્લા ૨૪ કલાકમાં ૧૪.૬ ડિગ્રી સેલ્સિયસ લઘુતમ તાપમાન નોંધાયું હતું જ્યારે મહત્તમ તાપમાન ૩૧.૩ ડિગ્રી સેલ્સિયસ નોંધાયું હતું. તદુપરાંત ગુજરાતના મુખ્ય ત્રણ શહેરોના છેલ્લા ૨૪ કલાકમાં નોંધાયેલ તાપમાનમાં સુરતમાં છેલ્લા ૨૪ કલાક દરમિયાન લઘુતમ તાપમાન ૧૮.૪ ડિગ્રી અને મહત્તમ તાપમાન ૩૧ ડિગ્રી સેલ્સિયસ, વડોદરામાં ૧૩.૬ ડિગ્રી સેલ્સિયસ અને મહત્તમ તાપમાન ૩૨.૨ ડિગ્રી સેલ્સિયસ તથા રાજકોટમાં ૧૩ ડિગ્રી સેલ્સિયસ લઘુતમ તાપમાન અને મહત્તમ તાપમાન ૩૧.૮ ડિગ્રી સેલ્સિયસ નોંધાયું હતું.