ભાવનગરના નારી ગામ નજીક ટ્રેક્ટર પાછળ રિક્ષા ધૂસી જતાં મહિલાનું મોત થયું

ભાવનગરના નારી ગામ મઢુલી પાસે ટ્રેક્ટર પાછળ રીક્ષા ઘૂસી જતાં રીક્ષામાં મુસાફરી કરી રહેલ મહિલાનું મોત નીપજ્યું હતું જ્યારે રીક્ષા ચાલક અને એક છ માસના બાળકને ઈજા થઈ હતી. અકસ્માત બાદ ટ્રેક્ટરનો ચાલક ટ્રેક્ટર મુકી ફરાર થઈ ગયો હતો. આ અંગે પ્રાપ્ત વિગત અનુસાર ભાવનગરના કુંભારવાડા, ગોપાલ સોસાયટીમાં રહેતા કલ્પેશભાઈ ધુડાભાઈ ભોરખીયા બપોરના સમયે તેમના કુટુંબી કાકા ધીરુભાઈ ગોબરભાઇ ભુરખીયાની બજાજ સીએનજી રીક્ષા નંબર જીજે ૦૪ એયુ ૬૯૨૭ લઈને મગલાણા ગામે રહેતા તેમના મોટા બાપુના દીકરી પારુલબેન સંતોષભાઈ ચાવડા અને તેના છ માસના દીકરા કૃણાલને લઈને ભાવનગર પરત આવી રહ્યા હતા ત્યારે નારી ગામ મઢુલી પાસે પસાર થઈ રહેલા ઈંટ ભરેલા ટ્રેક્ટર નં. જીજે ૨૨ જી ૫૦૩૫ ના ચાલકે અચાનક બ્રેક મારતા રીક્ષા ટ્રેક્ટરની ટ્રોલી સાથે અથડાતા રીક્ષામાં પાછળની સીટમાં બેઠેલા પારુલબેન રીક્ષામાંથી ફંગોળાઈ જઈને ટ્રેક્ટર ટ્રોલીની સાથે અથડાતા તેમને માથાના ભાગે ગંભીર બીજા પહોંચતા તેમનું મોત નીપજ્યું હતું, જ્યારે રીક્ષા ચાલક કલ્પેશભાઈ ભોરખીયા અને તેમના છ માસના ભાણેજ કૃણાલ ને ઇજા થતાં સારવાર અર્થે હોસ્પિટલ ખસેડવામાં આવેલ છે. અકસ્માત બાદ ટ્રેક્ટરનો ચાલક ટ્રેક્ટર મુકીને ફરાર થઈ ગયો હતો.આ બનાવ અંગે રીક્ષા ચાલક કલ્પેશભાઈ ધુડાભાઈ ભોરખીયાએ ટ્રેક્ટરના ચાલક વિરુદ્ધ વરતેજ પોલીસ મથકમાં ફરિયાદ નોંધાવી છે.