લોકસભા અને રાજ્યસભાની કાર્યવાહી અલગ અલગ સમયે ચાલશે

(જી.એન.એસ),નવીદિલ્હી,તા.૨૫
કોરોના વાયરસ રોગચાળાને ધ્યાનમાં રાખીને નીચલા ગૃહની બેઠક દરમિયાન બંને ગૃહોની ચેમ્બર અને ગેલેરીનો ઉપયોગ સભ્યોને બેસવા માટે કરવામાં આવશે. રાજ્યસભાની કાર્યવાહીનો વાસ્તવિક સમય શું હશે તેની કોઈ ઔપચારિક માહિતી નથી. જાે કે તેની બેઠક સવારે ૯ થી ૨ વાગ્યા સુધી યોજાય તેવી શક્યતા છે.રાષ્ટ્રપતિનું સંબોધન ૩૧ જાન્યુઆરીએ થશે. બજેટ સત્રનો બીજાે તબક્કો ૧૪ માર્ચથી શરૂ થશે અને ૮ એપ્રિલ સુધી ચાલશે.

વર્ષ ૨૦૨૦નું ચોમાસું સત્ર આવું પ્રથમ સત્ર હતું જે દરમિયાન કોવિડના કારણે બંને ગૃહોની બેઠકો એક જ દિવસે અલગ-અલગ સમયે યોજાઈ હતી. ગયા વર્ષના બજેટ સત્રના પ્રથમ તબક્કા દરમિયાન પણ આ જ વ્યવસ્થા કરવામાં આવી હતી. બજેટ સત્રના બીજા તબક્કા અને ત્યારબાદ ચોમાસુ સત્ર અને શિયાળુ સત્ર દરમિયાન લોકસભા અને રાજ્યસભાની કાર્યવાહી રાબેતા મુજબ શરૂ થઈ હતી. સંસદનું બજેટ સત્ર ૩૧ જાન્યુઆરીથી શરૂ થશે જ્યારે રાષ્ટ્રપતિ બંને ગૃહોની સંયુક્ત બેઠકને સંબોધિત કરશે અને ૮ એપ્રિલે સમાપ્ત થશે. સંસદીય બાબતોની કેબિનેટ સમિતિની ભલામણો અનુસાર, કેન્દ્રીય બજેટ ૧ ફેબ્રુઆરીએ રજૂ કરવામાં આવશે. બજેટ સત્રનો પ્રથમ તબક્કો ૧૧ ફેબ્રુઆરી સુધી ચાલશે.

આ પછી, સત્રનો બીજાે તબક્કો ૧૪ માર્ચથી શરૂ થશે અને એક મહિનાની રજા પછી ૮ એપ્રિલ સુધી ચાલશે.સંસદના બજેટ સત્રના પ્રથમ તબક્કા દરમિયાન, લોકસભા અને રાજ્યસભાની બેઠક દિવસના અલગ-અલગ સમયે યોજવામાં આવશે જેથી કરીને કોવિડ સંબંધિત સોશિયલ ડિસ્ટન્સના નિયમોનું પાલન કરી શકાય. ૩૧ જાન્યુઆરીથી શરૂ થઈ રહેલા બજેટ સત્ર દરમિયાન બંને ગૃહોની બેઠકો અલગ-અલગ સમયે પાંચ-પાંચ કલાક ચાલશે. ૧ ફેબ્રુઆરીએ સવારે ૧૧ વાગ્યે લોકસભાની બેઠક મળશે અને તે દિવસે સામાન્ય બજેટ રજૂ કરવામાં આવશે. ૨ ફેબ્રુઆરીથી લોકસભાની કાર્યવાહી સાંજે ૪ થી ૯ વાગ્યા સુધી ચાલશે. બજેટ સત્રનો પ્રથમ તબક્કો ૧૧ ફેબ્રુઆરીએ યોજાનાર છે.