જગદીશ ત્રિવેદીની અમેરીકાયાત્રાનું દાન ત્રણ કરોડને પાર – સોલ્ટ લેક સીટીમાં ૧૫ ઓગષ્ટ નિમિત્તે ભવ્ય કાર્યક્રમ

અમેરીકાના ઉટાહ રાજ્યમાં પર્વતોની ગિરીમાળાઓ વચ્ચે આવેલા રમણીય શહેર *સોલ્ટ લેક સીટી* ખાતે ૧૫મી ઓગષ્ટના દિવસે જગદીશ ત્રિવેદીનો ભવ્ય કાર્યક્રમ યોજાઈ ગયો. વિશુદ્ધ હાસ્ય સાથે દેશભક્તિની હદયસ્પર્શી વાતો દ્રારા આ શહેરમાં રહેતા ગુજરાતીઓ રસતરબોળ થયાં હતા. ૧૯૮૦માં રાજકોટની સિવિલ હોસ્પિટલમાં કીડનીનો વિભાગ ચાલુ કરાવનાર તથા રાજકોટમાં શ્રી બી.ટી.સવાણી કીડની હોસ્પિટલ શરું કરી સૌરાષ્ટ્ર અને કચ્છના કીડનીના દર્દીઓ માટે બહું મૂલ્યવાન સેવા કરનાર સેવાભાવી તબીબ ડો. પ્રદીપભાઈ કણસાગરાનો પણ ૧૫ ઓગષ્ટના દિવસે જન્મદિવસ હોવાથી અમેરીકામાં રહેતા કણસાગરા પરિવારે આ ભવ્ય કાર્યક્રમનું આયોજન કરેલ હતું. ડો. પ્રદીપ કણસાગરા અને ડો. જગદીશ ત્રિવેદી વચ્ચે એક સામ્ય એવું છે કે બન્ને વ્યક્તિએ પોતાના જીવનનાં પચાસ વર્ષ પુરા કરીને ધીકતી કમાણીનો ત્યાગ કરી શેષ જીવન સમાજસેવા માટે સમર્પિત કરેલ છે.

આ કાર્યક્રમમાં ડો. દિનેશ પટેલ તરફથી દસ લાખ રુપિયા, ડો. પ્રદીપ કણસાગરા તરફથી બે લાખ રુપિયા તથા મુળજીભાઈ ચૌધરી, જે.બી.સિંઘ, બિપીનભાઈ શાહ અને એક અનામી દાતા તરફથી એક-એક લાખ મળીને કુલ સોળ લાખ રુપિયાનું માતબર દાન ગુજરાતની ચાર સેવાભાવી સંસ્થાઓમાં રવાના કરેલ હતું. જેમાં વડોદરા પાસે આવેલા મોટા ફોફળીયા ગામની શ્રી છોટુભાઈ પટેલ હોસ્પિટલને દસ લાખ , રાજકોટની બી.ટી.સવાણી કીડની હોસ્પિટલને બે લાખ, શ્રી અણદાબાવા નેત્ર ચિકિત્સાલય – જામનગરને બે લાખ અને શ્રી વનબંધુ આરોગ્યધામ- આહવા, ડાંગને બે લાખ રુપિયા મળીને કુલ સોળ લાખ રુપિયાનું દાન રવાના કરેલ હતું. આમ વતનથી દૂર રહેલા ગુજરાતીઓએ હાસ્ય સાથે દેશભક્તિની વાતો સાંભળી વતન માટે સોળ લાખની સેવા કરી અને છેલ્લે રાષ્ટ્રગીતના ગાન સાથે સૌ છુટા પડ્યા હતા. જગદીશ ત્રિવેદીનો પ્રવાસનો આ છત્રીઓનો કાર્યક્રમ હતો અને આ કાર્યક્રમના સોળ લાખ મળીને આ પ્રવાસના દાનની રકમ ત્રણ કરોડને પાર કરી ગઈ હતી. બોલો ભારતમાતાકી જય – વંદેમાતરમ્