અમરેલી જિલ્લાના સાવરકુંડલા તાલુકાના ખડસલી ગામની બે પ્રતિભાશાળી દીકરીઓએ શૈક્ષણિક ક્ષેત્રમાં ઉત્કૃષ્ટ સિદ્ધિ મેળવી સમગ્ર સાધુ સમાજ તેમજ ગામનું નામ ગૌરવપૂર્ણ બનાવ્યું છે. તેમની આ સફળતાથી પરિવાર, શાળા અને સમગ્ર વિસ્તારમાં ખુશીની લાગણી જોવા મળી રહી છે.
લોકશાળા ખડસલીમાં અભ્યાસ કરતી જિલ ઘનશ્યામભાઈ ગોંડલીયાએ ધોરણ-9ની વાર્ષિક પરીક્ષામાં 92 ટકા ગુણ મેળવી પોતાની શાળામાં પ્રથમ ક્રમાંક હાંસલ કર્યો છે. સતત મહેનત, નિયમિત અભ્યાસ અને શિક્ષકોના માર્ગદર્શનના કારણે જિલે આ નોંધપાત્ર સફળતા પ્રાપ્ત કરી છે. તેની આ સિદ્ધિ અન્ય વિદ્યાર્થીઓ માટે પણ પ્રેરણારૂપ બની છે.
તે જ રીતે દેવાશી ઘનશ્યામભાઈ ગોંડલીયાએ ધોરણ-12ની પરીક્ષામાં 97.18 પર્સેન્ટાઇલ (PR) મેળવી લોકશાળા ખડસલીમાં પ્રથમ સ્થાન પ્રાપ્ત કર્યું છે. દેવાશીની આ સિદ્ધિ માત્ર પરિવાર માટે જ નહીં પરંતુ સમગ્ર સાધુ સમાજ માટે ગૌરવની બાબત બની છે. ઉચ્ચ પરિણામ સાથે તેણે પોતાના ઉજ્જવળ ભવિષ્યની મજબૂત શરૂઆત કરી છે.
બંને બહેનોએ સાબિત કર્યું છે કે દૃઢ નિશ્ચય, મહેનત અને યોગ્ય માર્ગદર્શન દ્વારા કોઈપણ લક્ષ્ય પ્રાપ્ત કરી શકાય છે. તેમની સફળતા પાછળ માતા-પિતાના સંસ્કાર, શિક્ષકોનું માર્ગદર્શન અને સતત પરિશ્રમનો મહત્વનો ફાળો રહ્યો છે.
ખડસલી ગામની આ બે દીકરીઓની સિદ્ધિથી સમગ્ર વિસ્તારમાં આનંદ અને ગૌરવની લાગણી પ્રસરી છે. સમાજના આગેવાનો, શિક્ષકો અને ગ્રામજનોએ બંને વિદ્યાર્થીનીઓને અભિનંદન પાઠવી તેમના ઉજ્જવળ ભવિષ્ય માટે શુભેચ્છાઓ વ્યક્ત કરી છે. તેમની આ સફળતા અન્ય વિદ્યાર્થીઓને પણ શિક્ષણ ક્ષેત્રે શ્રેષ્ઠ પ્રદર્શન કરવા માટે પ્રેરણા આપશે.
Recent Comments