ટીંબી શહેરની અંદર તાત્કાલિક આર.સી.સી. રોડ પૂર્ણ કરો નહીં તો જનઆંદોલન થશે : કોંગ્રેસ પક્ષના તાલુકા પંચાયત સભ્ય નરેશભાઈ જાદવ

જાફરાબાદ તાલુકાના ટીંબી શહેરમાં સ્ટેટ આર એન્ડ બી વિભાગ દ્વારા છેલ્લા પાંચ મહિનાથી આર.સી.સી. રોડનું કામ ચાલી રહ્યું છે, પરંતુ આજે પણ રોડની હાલત જોઈને *લોકોમાં ભારે રોષ ફેલાયો છે.* કામની ગતિ *“ગોકુળ ગાય”* જેવી ધીમી હોવા ઉપરાંત કામગીરીમાં ગંભીર બેદરકારી અને *નબળી ગુણવત્તા* જોવા મળી રહી છે.
શહેરની અંદર ઠેર ઠેર કાંકરીઓના ઢગલા કરી દેવામાં આવ્યા છે, *ગટરો તોડી* નાખવામાં આવી છે અને રોડ ઉપર *આડેધડ મટીરીયલ પાથરી દેવાતા વેપારીઓ, વાહનચાલકો અને સામાન્ય જનતા ભારે હેરાનગતિ ભોગવી રહી છે*. લોકો માટે ચાલવું પણ મુશ્કેલ બની ગયું છે. વેપારીઓના ધંધા ઉપર પણ માઠી અસર પડી રહી છે.
*ખાસ કરીને ૬૬ કે.વી. સબ સ્ટેશન નજીકની સ્થિતિ અત્યંત જોખમી બની ગઈ છે*, જ્યાં વાહનચાલકોને વીજ તાર નીચેથી પસાર થવું પડે છે. કોઈપણ સમયે મોટો અકસ્માત સર્જાય તેવી ભીતિ વચ્ચે તંત્ર મૌન ધારણ કરી બેઠું હોય તેવી સ્થિતિ સર્જાઈ છે.
*ચોમાસાની ઋતુ બેસવાની હોવા છતાં હજુ સુધી રોડનું કામ પૂર્ણ ન થવું એ કોન્ટ્રાક્ટર અને જવાબદાર વિભાગની ગંભીર બેદરકારી દર્શાવે છે*. જો વરસાદ શરૂ થશે તો લોકો માટે હાલત વધુ દયનીય બની જશે અને અકસ્માતોનું જોખમ પણ વધી જશે.
આ બાબતે તાલુકા પંચાયત કોંગ્રેસ પક્ષના સભ્ય શ્રી *નરેશભાઈ પ્રવીણભાઈ જાદવે આક્રોશ વ્યક્ત કરતા જણાવ્યું છે* કે ટીંબી શહેરની જનતા હવે વધુ સહન કરવાની સ્થિતિમાં નથી. તાત્કાલિક *પૂરજોશમાં રોડનું કામ પૂર્ણ કરવામાં આવે, ગુણવત્તાયુક્ત કામગીરી કરવામાં આવે અને લોકોને પડતી હાલાકી દૂર કરવામાં આવે.*
જો તંત્ર અને કોન્ટ્રાક્ટર દ્વારા તાત્કાલિક કામગીરી નહીં કરવામાં આવે તો ગામની જનતાને સાથે રાખી ઉગ્ર *જનઆંદોલન* અને વિરોધ કાર્યક્રમો કરવામાં આવશે, જેની સંપૂર્ણ જવાબદારી સંબંધિત વિભાગ અને કોન્ટ્રાક્ટરની રહેશે તેમ તાલુકા પંચાયત કોંગ્રેસ પક્ષના સભ્ય *શ્રી નરેશભાઈ પ્રવીણભાઈ જાદવે* જણાવ્યું હતું.