“વડીલોના આશીર્વાદ એ જ અમારી અમૂલ્ય સંપત્તિ અને તેમની પીડામાંથી મુક્તિ બાદ ચહેરા પરઆવતું સ્મિત એ જ મારા માટે સાક્ષાત્ ઈશ્વરનાં દર્શન સમાન છે”:કસવાળા

સાવરકુંડલા: વડીલો એ પરિવારનો આધાર, સમાજનો અનુભવ અને સંસ્કારોની અમૂલ્ય ધરોહર છે.
તેમના જીવનમાં સુખ, સુવિધા અને સન્માન વધારવું એ માત્ર સામાજિક જવાબદારી જ નહીં, પરંતુ
આપણી સંસ્કૃતિના મૂલ્યોનું જતન પણ છે. આ જ સેવાભાવનાને સાકાર કરતા ભારત સરકારના
સામાજિક ન્યાય અને અધિકારિતા મંત્રાલય, ભારતીય કૃત્રિમ અંગ નિર્માણ નિગમ (ALIMCO) તથા
અમરેલી જિલ્લા વહીવટી તંત્રના સંયુક્ત ઉપક્રમે સાવરકુંડલા શહેરની મહાત્મા ગાંધી ધર્મશાળા ખાતે
રાષ્ટ્રીય વયોશ્રી યોજના અંતર્ગત વરિષ્ઠ નાગરિકો માટે નિઃશુલ્ક સાધન સહાય મૂલ્યાંકન અને તપાસ કેમ્પ
યોજાયો હતો, જેમાં ૨૦૦થી વધુ વડીલોએ લાભ લીધો હતો.
વડાપ્રધાન શ્રી નરેન્દ્રભાઈ મોદીના સેવા, સુશાસન અને ગરીબ કલ્યાણનાં ૨૫ વર્ષના સેવાયજ્ઞની
ઉજવણીના ભાગરૂપે યોજાયેલા આ કાર્યક્રમનો મુખ્ય ઉદ્દેશ જરૂરિયાતમંદ વડીલોને શારીરિક
મુશ્કેલીઓમાંથી રાહત અપાવી તેમના જીવનને વધુ સરળ, સુગમ, સ્વસ્થ અને આત્મનિર્ભર બનાવવાનો
રહ્યો હતો.
આ કેમ્પનો શુભારંભ અમરેલી લોકસભાના માનનીય સાંસદ શ્રી ભરતભાઈ સુતરીયા તેમજ
સાવરકુંડલા–લીલિયા વિધાનસભા મતવિસ્તારના ધારાસભ્ય શ્રી મહેશભાઈ કસવાળા ના હસ્તે દીપ
પ્રાગટ્ય દ્વારા કરવામાં આવ્યો હતો. આ કાર્યક્રમમાં સાવરકુંડલા શહેર તેમજ આસપાસના
વિસ્તારોમાંથી મોટી સંખ્યામાં વડીલો, નાગરિકો અને વિવિધ ક્ષેત્રના આગેવાનોએ જોડાઈને વડીલોની
સેવા અને સુખાકારી પ્રત્યેની સામૂહિક પ્રતિબદ્ધતા વ્યક્ત કરી હતી.

રાષ્ટ્રીય વયોશ્રી યોજના ભારત સરકારની એવી લોકકલ્યાણકારી પહેલ છે, જે વયના કારણે શારીરિક
મુશ્કેલીઓનો સામનો કરતા જરૂરિયાતમંદ વરિષ્ઠ નાગરિકોને સહાયક સાધનો ઉપલબ્ધ કરાવી તેમના
જીવનની ગુણવત્તા સુધારવામાં મદદરૂપ બને છે.
કેમ્પ દરમિયાન ૬૦ વર્ષથી વધુ વયના વરિષ્ઠ નાગરિકોની શારીરિક સ્થિતિ અને જરૂરિયાતોનું નિઃશુલ્ક
મૂલ્યાંકન કરવામાં આવ્યું હતું. જરૂરિયાત અને પાત્રતાના આધારે વડીલોને વ્હીલચેર, શ્રવણયંત્ર, વૉકિંગ
સ્ટિક, વૉકર, ટોયલેટ ખુરશી, કમરનો પટ્ટો, ઘૂંટણનો પટ્ટો, ગાદી સહિતનાં વિવિધ સહાયક સાધનો
ઉપલબ્ધ કરાવવા માટેની પ્રક્રિયા હાથ ધરવામાં આવી હતી.
આ સાધનો માત્ર રોજિંદી પ્રવૃત્તિઓને સરળ બનાવવામાં જ મદદરૂપ બનતાં નથી, પરંતુ વડીલોના
આત્મવિશ્વાસમાં વધારો કરી તેમને વધુ સ્વતંત્ર અને સન્માનપૂર્ણ જીવન જીવવા માટે પણ પ્રેરિત કરે છે.
“વડીલોની સેવામાં જ સાચા સંસ્કાર અને જનસેવાની સાર્થકતા” — મહેશભાઈ કસવાળા
આ પ્રસંગે ધારાસભ્ય શ્રી મહેશભાઈ કસવાળાએ વડીલો પ્રત્યેની સંવેદના વ્યક્ત કરતાં જણાવ્યું હતું કે,
વડાપ્રધાન શ્રી નરેન્દ્રભાઈ મોદીના સેવા, સુશાસન અને ગરીબ કલ્યાણના મંત્રનો સાચો અર્થ સમાજના
છેવાડાના અને જરૂરિયાતમંદ વ્યક્તિ સુધી સરકારી યોજનાનો લાભ પહોંચે ત્યારે જ સાર્થક બને છે.
રાષ્ટ્રીય વયોશ્રી યોજના એ વડીલો પ્રત્યે સન્માન, સંવેદના અને સેવા ભાવનાને સાકાર કરતી મહત્ત્વપૂર્ણ
પહેલ છે.
તેમણે વધુમાં જણાવ્યું હતું કે, “વડીલો આપણા પરિવાર અને સમાજની અમૂલ્ય મૂડી છે. જીવનભર
જેમણે પરિવાર, સમાજ અને રાષ્ટ્રના ઘડતરમાં પોતાનું યોગદાન આપ્યું છે, તેમના જીવનના આ તબક્કે
તેમની પીડા ઓછી કરવી અને જીવનને વધુ સુખમય બનાવવું એ આપણી નૈતિક ફરજ છે.”
“વડીલોનો સંતોષ અને તેમના આશીર્વાદ અમારા માટે અમૂલ્ય સંપત્તિ છે. કોઈ વડીલને શારીરિક
પીડામાંથી રાહત મળે, તેમની મુશ્કેલી ઓછી થાય અને તેમના ચહેરા પર સંતોષભર્યું સ્મિત ખીલે, એ
મારા માટે સાક્ષાત્ ઈશ્વરનાં દર્શન સમાન છે. જનપ્રતિનિધિ તરીકે લોકોની સેવા કરવાની તક મળે અને
ખાસ કરીને વડીલોના જીવનમાં આનંદની ક્ષણ લાવી શકાય, એ જ મારા માટે સૌથી મોટો સંતોષ અને
જનસેવાની સાચી સાર્થકતા છે.”
તેમણે આ સેવાકાર્યને સફળ બનાવવા માટે ભારત સરકાર, જિલ્લા વહીવટી તંત્ર, ALIMCO અને
આયોજન સાથે સંકળાયેલા તમામ અધિકારીઓ તથા કર્મચારીઓનો આભાર વ્યક્ત કર્યો હતો.

આ કેમ્પને વડીલો તરફથી સારો પ્રતિસાદ મળ્યો હતો. ૨૦૦થી વધુ વડીલોનું મૂલ્યાંકન કરીને તેમની
જરૂરિયાતો અનુસાર સહાયક સાધનો પૂરા પાડવાની પ્રક્રિયા હાથ ધરવામાં આવવી એ આ સેવાકાર્યની
મહત્ત્વપૂર્ણ સિદ્ધિ રહી હતી.
રાષ્ટ્રીય વયોશ્રી યોજના જેવી લોકકલ્યાણકારી પહેલો દ્વારા વરિષ્ઠ નાગરિકોને સહાય પહોંચાડવાની સાથે
સમાજમાં વડીલો પ્રત્યે આદર, કૃતજ્ઞતા અને જવાબદારીની ભાવના પણ વધુ મજબૂત બને છે.
વડીલોના જીવનમાં સુખ, સગવડ અને આત્મવિશ્વાસ વધે, તેમની શારીરિક મુશ્કેલીઓ ઓછી થાય અને
તેઓ ગૌરવભેર જીવન જીવી શકે — એ જ આ સેવાકાર્યનો સાચો હેતુ છે.
“સેવા એ માત્ર કાર્ય નથી, પરંતુ સંવેદનાનો સંકલ્પ છે; અને વડીલોના આશીર્વાદ એ સંકલ્પને સફળ
બનાવતી સૌથી મોટી શક્તિ છે.”
આ ભાવના સાથે સાવરકુંડલામાં યોજાયેલો આ કેમ્પ વડીલો પ્રત્યેના સન્માન, સંવેદના અને જનસેવાના
ઉમદા સંકલ્પને સાકાર કરતો સેવાયજ્ઞ બની રહ્યો હતો
આ પ્રસંગે અમરેલી જિલ્લા પંચાયતનાં પ્રમુખ શ્રીમતી દક્ષાબેન ચોડવડિયા, અમરેલી જિલ્લા કલેક્ટર શ્રી
વિકલ્પ ભારદ્વાજ, સાવરકુંડલા નગરપાલિકાનાં પ્રમુખ શ્રીમતી નયનાબેન કાપડિયા, તાલુકા પંચાયતનાં
પ્રમુખ શ્રીમતી દક્ષાબેન મહીડા તથા આર.સી.આઈ.ના ગવર્નિંગ કાઉન્સિલ મેમ્બર શ્રીમતી પૂજાબેન
પટેલ સહિતના મહાનુભાવો ઉપસ્થિત રહ્યા હતા.