અમરેલી જિલ્લામાં ખેતી ક્ષેત્રે ખેડૂતોને આર્થિક રીતે વધુ સક્ષમ બનાવવાની દિશામાં નવી પહેલ હાથ ધરવામાં આવી રહી છે. અમરેલી તાલુકાના શેડુભાર ગામ ખાતે બની રહેલા ગોપીનાથ બાયો-CNG પ્લાન્ટની કિસાન મોરચા ગુજરાત પ્રદેશ ભાજપ પ્રમુખ હિરેનભાઈ હીરપરાએ મુલાકાત લીધી હતી. આ મુલાકાત દરમિયાન પ્લાન્ટની કામગીરી, તેની ટેકનોલોજી અને ભવિષ્યમાં ખેડૂતોને મળનારા લાભો અંગે માહિતી મેળવી હતી.
શેડુભાર ખાતે જતીન મનસુખભાઈ ગજેરાના માર્ગદર્શન હેઠળ ગોપીનાથ બાયો-CNG પ્લાન્ટનું નિર્માણ કાર્ય ચાલી રહ્યું છે. આ પ્લાન્ટમાં નેપિયર ઘાસ અને કૃષિ અવશેષોનો ઉપયોગ કરીને બાયો-CNG ગેસનું ઉત્પાદન કરવાનું આયોજન છે. આ પ્રોજેક્ટમાં ખેડૂતો માટે નેપિયર ઘાસની ખેતી આવકનો નવો વિકલ્પ બની શકે છે.
પ્લાન્ટ માટે અંદાજે 1,000 વીઘા વિસ્તારમાં નેપિયર ઘાસના વાવેતરનું આયોજન કરવામાં આવ્યું છે. પ્લાન્ટ કાર્યરત થયા બાદ દરરોજ 10 ટનથી વધુ બાયો-CNG ઉત્પાદન કરવાનો લક્ષ્યાંક રાખવામાં આવ્યો છે.
આ પ્રકારના પ્રોજેક્ટથી કૃષિ અવશેષોનો ઉપયોગ, વૈકલ્પિક ઊર્જાનું ઉત્પાદન અને ખેડૂતોને વધારાની આવકની તકો ઊભી થઈ શકે છે. હિરેનભાઈ હીરપરાની આ મુલાકાત દરમિયાન પ્રોજેક્ટની પ્રગતિ અને કૃષિ ક્ષેત્રે તેની સંભાવનાઓ અંગે ચર્ચા કરવામાં આવી હતી.
