અધર્મ પર ધર્મના વિજયના પ્રતિક સમાન વિજયાદશમી (દશેરા)ના પવિત્ર પર્વની સાવરકુંડલા શહેરમાં આજે ધામધૂમથી અને શ્રદ્ધાપૂર્વક ઉજવણી કરવામાં આવી હતી. આ વર્ષે તિથિની ગરબડ હોવા છતાં, લોકોના ઉત્સાહમાં કોઈ ઉણપ જોવા મળી નહોતી.
દશેરાના પાવન અવસરે સાવરકુંડલામાં વિવિધ સ્થળોએ શસ્ત્ર પૂજન તેમજ હોમ-હવન જેવા ધાર્મિક કાર્યક્રમોનું સુંદર આયોજન કરવામાં આવ્યું હતું. ક્ષત્રિય સમાજ તથા વિવિધ સંગઠનો દ્વારા પરંપરાગત રીતે શસ્ત્રો અને વાહનોનું પૂજન કરીને વિજયાદશમીની ઉજવણી કરાઈ હતી.
પર્વને અનુલક્ષીને સવારથી જ શહેરની મીઠાઈ અને ફરસાણની દુકાનોમાં ભારે ભીડ જોવા મળી હતી. લોકોએ વિજયાદશમીના ઉત્સવને માણવા માટે જલેબી, ફાફડા અને વિવિધ મીઠાઈઓની જંગી ખરીદી કરી હતી, જેના કારણે વેપારીઓમાં પણ આનંદનો માહોલ છવાયો હતો.
ઉલ્લેખનીય છે કે, દશેરાનો તહેવાર એ સત્ય અને ધર્મના વિજયનું પ્રતિક છે. આજના દિવસે દિલ્હી અને અમદાવાદ જેવા દેશના મોટા શહેરોમાં ભવ્ય રાવણ દહનના કાર્યક્રમો યોજાય છે, ત્યારે સાવરકુંડલા શહેરમાં પણ લોકોએ પરંપરા અને સંસ્કૃતિને જાળવી રાખીને ઉત્સાહપૂર્વક આ પર્વની ઉજવણી કરી હતી.
