સમાજમાં રહેલું દહેજનું દુષણ લગ્ન પછી પરિવારમાં ભૂકંપ લાવી દેતું હોય છે. આવી જ એક ઘટના સુરતમાં બની છે જ્યાં રફીક ગફફાર પટેલ નામના શખ્સે મફતમાં રિક્ષાની લાલચ રાખીને પોતાની પત્ની તથા ત્રણ દીકરીઓની ઘરમાંથી કાઢી મૂક્યાનો કિસ્સો સામે આવ્યો છે. આ અંગે મહિલા પોલીસ સ્ટેશનમાં રફીકની પત્નીએ ફરિયાદ નોંધાવી છે.
૨૭ વર્ષની નઝ્મા (નામ બદલ્યું છે)ના લગ્ન મુસ્લિમ શરીયત પ્રમાણે વર્ષ ૨૦૧૧માં થયા હતા. લગ્ન પછી શાહપુર મદીના મસ્જીદની સામે લિંબાયત વિસ્તારમાં રહેતી નઝ્માને તેના પતિ થકી ત્રણ દીકરીઓને જન્મ આપ્યો છે. લગ્નના ત્રણ વર્ષ બાદ નઝ્માના પતિ અને સાસુ તથા નણંદ દ્વારા શારીરિક અને માનસિક ત્રાસ આપવાનું શરુ કરવામાં આવ્યું હતું. રસોઈ બાબતના નાના ઝઘડામાં નઝ્માના સાસુ તેને કહેતા કે, “તું મને ગમતી નથી, તને ઘરકામ બરાબર આવડતું નથી, તારો બાપ લુખ્ખો છે, તમે ભિખારી છો.” બીજી તરફ પતિ નઝ્માને તેના પિતાને ખોટા કેસમાં ફસાવી દેવાની ધમકી આપતો અને દહેજની માગણી કરતો હતો.
નઝ્માએ ફરિયાદમાં લખાવ્યું છે કે, મારા નણંદ નજીકમાં રહેતા હોવાથી તેઓ વારંવાર મારા ઘરે આવીને મારા પતિને ચઢાવીને મને માર ખવડાવતા હતા. આ બધું થતા પતિ મને તલાક આપી દેવાની ધમકી આપતા હતા. પિયરમાંથી મળેલું સોનું સાસુએ વેચી નાખ્યા અને બીજા ઘરેણાં ગીરવે મૂકી દીધા.
એક પછી એક ત્રણ છોકરીઓ થતા પતિ, સાસુ અને નણંદ પિયરમાં આવીને નઝ્માનું સાથે દુરવ્યવહાર કર્યો હતો અને ગાળો દઈને કહ્યું હતું કે, તું છોકરીઓ પેદા કરે છે, મારે ત્રણ છોકરીઓ નથી જાેઈતી, તારો બાપ અમને નવી રિક્ષા લેવા માટે રુપિયા આપતો નથી. પતિએ એક દિવસ આવેશમાં આવીને નઝ્મા અને તેની ત્રણ માસૂમ દીકરીઓને ઘરમાંથી કાઢી મૂકી હતી અને ધમકી આપી હતી કે, તું નવી રિક્ષા માટે એક લાખ રુપિયા લાવીશ તો જ હું તને સારી રીતે રાખીશ, નહીં તો પાછી આવતી નહીં.
સાસરિયા દ્વારા એક તરફ નઝ્માના પિતા માટે અપશબ્દો બોલીને તેને માનસિક ત્રાસ આપતા અને બીજી તરફ રિક્ષા માટે રુપિયાની માગણી કરવામાં આવતી હતી. પરિણીતાએ પોતાના પતિ રફીક ગફ્ફારભાઈ પટેલ સહિત સાસુ હાજરાબીબી ગફ્ફારભાઈ પટેલ અને નણંદ નસીમ મુબારક પટેલ સામે આઈપીસીની કલમ ૪૯૮એ, ૩૨૩, ૫૦૪, ૧૧૪ અને દહેજ પ્રતિબંધ અધિનિયમ હેઠળ ફરિયાદ નોંધાવી છે.
Recent Comments