કાણકીયા કોલેજમાં “યુથ રેડક્રોસ ક્લબ”ની સ્થાપના કરવામાં આવી.

આજરોજ નૂતન કેળવણી મંડળ સંચાલિત વી.ડી. કાણકીયા આર્ટસ એન્ડ એમ.આર. સંઘવી કોમર્સ કોલેજ, સાવરકુંડલા ખાતે ઇન્ડિયન રેડ ક્રોસ સોસાયટી ના અનુસંધાને કોલેજના વિદ્યાર્થીઓ માટે “યુથ રેડક્રોસ ક્લબ”ની સ્થાપના કરવામાં આવી. જેમાં આર્ટસ અને કોમર્સ ના પ્રથમ વર્ષના વિદ્યાર્થીઓ જોડાયા હતા. આ તકે રેડક્રોસ સોસાયટી સાવરકુંડલા ના સેક્રેટરી મેહુલભાઈ વ્યાસ ખાસ ઉપસ્થિત રહેલા.

 “યુથ રેડ ક્રોસ ક્લબ”માં નોંધાયેલા તમામ સભ્યોને આજે મેહુલભાઈ વ્યાસ દ્વારા તબીબી સુવિધાને લગતી ખાસ અગત્યની CPR  અને રિકવરી પોઝિશનની એક તાલીમ આપવામાં આવેલ. આ તાલીમ દ્વારા વિદ્યાર્થીઓને આજે શીખવવામાં આવેલ કે એવી કટોકટી કે આપત્તિના સમયમાં તે બેશુદ્ધ કે બેભાન બનેલ વ્યક્તિને અથવા તો જેના હૃદયના ધબકારા મંદ પડી ગયા કે બંધ થઈ ગયા હોય તેમને કેવી રીતે બચાવી શકાય.જે પ્રેક્ટીકલ રીતે સમજાવવામાં આવેલ.આજના સમયની જરૂરિયાતને ધ્યાનમાં રાખી આ એક અગત્યની તાલીમ વિદ્યાર્થીઓને આપવામાં આવેલ.

આ ક્લબમાં જોડાનાર તમામ વિદ્યાર્થીઓને આવતા દિવસોમાં સર્ટિફિકેટ અને યુથ રેડ ક્રોસ ક્લબ નો બેઝ પણ આપવામાં આવશે. આવતીકાલે રેડક્રોસ ની ડ્રોઈંગ કોમ્પીટીશન નું આયોજન કરેલ છે.જેમાં ” યુથ રેડ ક્રોસ ક્લબ”માં જોડાયેલા આ વિદ્યાર્થીઓ ભાગ લેશે.કોલેજના પ્રિ.ડો.એસ.સી.રવિયા એ આ તાલીમનું મહત્વ સમજાવતા જણાવેલ કે આગામી સમયમાં વિદ્યાર્થીઓ પોતે કે પોતાના પરિવારને અથવા કોઈ એવી પરિસ્થિતિમાં અન્ય લોકોને પણ મદદરૂપ થઈ શકશે અને આવી તાલીમ દ્વારા આગામી સમયમાં પોતાની આવકના સાધન તરીકે પણ આ આવડતને વિકસાવી શકે.સમગ્ર કાર્યક્રમનું સફળ સંચાલન કોમર્સ વિભાગના ફેકલ્ટી પ્રા.ડૉ.હરેશ દેસરાણી દ્વારા કરવામાં આવેલ તેમજ કોલેજના તમામ સ્ટાફ નો  સપૂર્ણ સહયોગ રહેલ.