બોરાળા ગામના પૂરગ્રસ્ત વિસ્તારોની મુલાકાત, જિલ્લા પંચાયત પ્રમુખ દક્ષાબેન ચોડવડીયાએ રાહત કામગીરીની સમીક્ષા કરી

સાવરકુંડલા: ભારે વરસાદના કારણે પૂરગ્રસ્ત બનેલા સાવરકુંડલા તાલુકાના બોરાળા ગામની જિલ્લા પંચાયત પ્રમુખ દક્ષાબેન ધર્મેશભાઈ ચોડવડીયાએ વહીવટી તંત્રના અધિકારીઓ સાથે રૂબરૂ મુલાકાત લીધી હતી. તેમણે અસરગ્રસ્ત વિસ્તારોમાં સ્થળ પર જઈ પરિસ્થિતિનું મૂલ્યાંકન કર્યું અને વરસાદથી થયેલા નુકસાન અંગે વિગતવાર માહિતી મેળવી હતી.

મુલાકાત દરમિયાન જિલ્લા પંચાયત પ્રમુખે રાહત અને પુનઃસ્થાપન કામગીરીની સમીક્ષા કરી હતી. અસરગ્રસ્ત પરિવારો સુધી જરૂરી સહાય સમયસર પહોંચે, નુકસાનનું યોગ્ય સર્વેક્ષણ કરવામાં આવે અને પુનઃસ્થાપન કામગીરીમાં વધુ ગતિ આવે તે માટે સંબંધિત અધિકારીઓને જરૂરી સૂચનાઓ આપી હતી.

દક્ષાબેન ચોડવડીયાએ જણાવ્યું હતું કે પૂરગ્રસ્ત પરિવારોને કોઈપણ પ્રકારની મુશ્કેલી ન પડે તે માટે તંત્ર સતત કાર્યરત છે. પીવાનું પાણી, આરોગ્ય, માર્ગ વ્યવસ્થા અને અન્ય જરૂરી સેવાઓ ઝડપથી પૂર્વવત્ થાય તે માટે તમામ વિભાગો સંકલન સાથે કામગીરી કરી રહ્યા છે.

મુલાકાત દરમિયાન સ્થાનિક આગેવાનો, ગ્રામજનો તથા વિવિધ વિભાગોના અધિકારીઓ પણ ઉપસ્થિત રહ્યા હતા. જિલ્લા પંચાયત પ્રમુખે લોકોને જરૂરી સાવચેતી રાખવા, તંત્રની સૂચનાઓનું પાલન કરવા અને કોઈપણ મુશ્કેલી સર્જાય તો તાત્કાલિક વહીવટી તંત્રનો સંપર્ક કરવા અપીલ કરી હતી.