રાજ્ય સરકારના સુશાસનના પાંચ વર્ષ નિમિતે અમરેલી જિલ્લામાં આજે ૬ ઓગસ્ટના યુવા શક્તિ દિવસની ઉજવણી કરાશે

મ્યુનિસિપલ ફાયનાન્સ બોર્ડના ચેરમેન શ્રી ધનસુખભાઇ ભંડેરી ખાસ ઉપસ્થિત રહેશે

મુખ્યમંત્રી શ્રી વિજયભાઈ રૂપાણી અને નાયબ મુખ્યમંત્રી શ્રી નીતિનભાઇ પટેલના નેતૃત્વ હેઠળની વર્તમાન રાજ્ય સરકારના પાંચ વર્ષનો યશસ્વી કાર્યકાળ પૂર્ણ થતાં રાજ્યભરમાં ઉજવાઇ રહેલ ‘પાંચ વર્ષ આપણી સરકારના સૌનો સાથ સૌનો વિકાસના’ કાર્યક્રમના પાંચમા દિવસે એટલે કે આજે તા. ૬ ઓગસ્ટના યુવા શક્તિ દિવસની ઉજવણી કરવામાં આવશે. જેના ભાગરૂપે અમરેલીના દિલીપભાઈ સંઘાણી હોલ ખાતે મ્યુનિસિપલ ફાયનાન્સ બોર્ડના ચેરમેન શ્રી ધનસુખભાઇ ભંડેરીની પ્રેરક ઉપસ્થિતિ કાર્યક્રમ યોજાનાર છે.

નોંધનીય છે કે અમરેલી રોજગાર વિભાગ દ્વારા જિલ્લામાં ૦૧/૦૪/૨૦૨૧ થી અત્યાર સુધી ૧૯ જેટલા ઔદ્યોગિક ભરતીમેળા યોજવામાં આવેલા છે. જેમાં ખાનગી ઉદ્યોગો દ્વારા નોંધાયેલી કુલ ૧૭૯૨ ખાલી જગ્યાઓ ઉપર ૮૭૪ જેટલા યુવાનોને ખાનગી ક્ષેત્રે રોજગારી પૂરી પાડવામાં આવી છે. જે પૈકીના ૪૦૦ જેટલા યુવાનોને એનાયત પત્રો વિતરણ થનાર છે. આ ઉપરાંત રાજ્ય સરકારના વિવિધ વિભાગોમાં સીધી ભરતીથી અમરેલી જિલ્લાના નિમણુક પામેલા આશરે ૧૭૦ યુવાનોને નિમણુંક પત્રો પણ આપવામાં આવશે.