જામજાેધપુરના પરડવા નજીક દારૂના જથ્થા સાથે બે ઝડપાયા, ૧૨ લાખનો મુદ્દામાલ જપ્ત

જામજાેધપુર-અમરાપર રોડ પર આવેલા પરડવા ગામની સીમ નજીકથી એલસીબીની ટીમે એક ગાડીને આંતરીને તલાશી લેતા તેમાંથી રૂા.૪.૯૦ લાખની કિંમતનો ઇંગ્લીશ દારૂનો જથ્થો ઝડપી પાડ્યો હતો. તેમજ દારૂનો જથ્થો, પાઉચ અને ૧૦,૦૦૦ ની કિંમતના બે મોબાઇલ અને વાહન સહિત કુલ રૂા.૧૨ લાખના મુદ્દામાલ સાથે બે શખ્સોને ઝડપી પૂછપરછ આરંભી હતી. આ અંગે મળતી માહિતી મુજબ જામજાેધપુર-અમરાપર રોડ પર પરડવા ગામની સીમના રોડ પરથી વાહનમાં દારૂનો જથ્થો પસાર થવાની હે.કો. અશોક સોલંકી, ધાના મોરી, પો.કો. કિશોર પરમારને મળેલી સંયુક્ત બાતમીના આધારે જિલ્લા પોલીસ વડા પ્રેમસુખ ડેલુની સૂચનાથી પીઆઈ જે.વી. ચૌધરી, પીએસઆઈ આર.એ.કરમટા, એસ.પી. ગોહિલ તથા સ્ટાફ સહિતનાએ પરડવા ગામમાં વોચ ગોઠવી હતી.

આ દરમિયાન બાતમી મુજબની ગાડી આવતા તેને આંતરીને તલાશી લેતા તેમાંથી રૂા.૪,૯૦,૫૬૦ ની કિંમતના ઇંગ્લીશ દારૂના ૭૦૦૮ નંગ પાઉચ મળી આવ્યા હતાં. જેથી એલસીબીની ટીમે જૂનાગઢના મુખારખ ગુલામ સાંધ અને પોરબંદરના મેરામ ભુદા રાડા નામના બે શખ્સોને ઝડપી લઇ ૧૦,૦૦૦ ની કિંમતના ૨ મોબાઇલ અને ૭ લાખની કિંમતનું વાહન તેમજ રૂા.૪.૯૦ લાખની કિંમતના દારૂના પાઉચ મળી કુલ રૂા.૧૨,૦૦,૫૬૦ ના મુદ્દામાલ સાથે ધરપકડ કરી પૂછપરછ હાથ ધરી હતી. જેમાં દારૂનું સપ્લાયર જૂનાગઢના ધીરેન કારિયા નામના શખ્સ દ્વારા કરવામાં આવ્યું હોવાનું ખુલતા એલસીબીએ ધીરેનની શોધખોળ માટે ચક્રો ગતિમાન કર્યા હતાં.