લતાજીના સુવર્ણ યુગમાં પોતાની આગવી ઓળખ ઊભી કરનાર ‘પદ્મ ભૂષણ’ સન્માનિત મધુર અવાજ હંમેશ માટે શાંત થયો: સાવરકુંડલાના સંગીત પ્રેમીઓમાં ભારે ગમગીની
———————————————————-
ભારતીય સંગીત જગતમાંથી એક અત્યંત દુખદ સમાચાર સામે આવ્યા છે. ૧૯૬૦ અને ૭૦ના દાયકામાં પોતાના મધુર અને ભાવપૂર્ણ અવાજથી કરોડો દિલો પર રાજ કરનારા દિગ્ગજ પાર્શ્વ ગાયિકા (Playback Singer) સુમન કલ્યાણપુરનું રવિવારની સાંજે મુંબઈ ખાતે નિધન થયું છે. ૮૯ વર્ષની વયે તેમણે લોખંડવાલા સ્થિત પોતાના નિવાસસ્થાને અંતિમ શ્વાસ લીધા હતા. તેમના જવાથી સમગ્ર ફિલ્મ ઈન્ડસ્ટ્રી અને સંગીત પ્રેમીઓમાં શોકની લહેર દોડી ગઈ છે.
વધતી ઉંમરની બીમારીઓ બની કારણ
સુમન કલ્યાણપુરના મરાઠી જીવનચરિત્ર ‘સુમન સુગંધ’ના લેખિકા અને તેમના નજીકના મિત્ર મંગલા ખાડિલકરે આ દુખદ સમાચારની પુષ્ટિ કરી છે. તેમણે જણાવ્યું કે, સુમનજી વધતી જતી ઉંમરને કારણે સ્વાસ્થ્ય સંબંધી અનેક સમસ્યાઓનો સામનો કરી રહ્યા હતા. રવિવારે રાત્રે આશરે ૮ વાગ્યે ખૂબ જ શાંતિપૂર્ણ રીતે તેમણે અંતિમ શ્વાસ લીધા હતા. જીવનના છેલ્લા દિવસોમાં પણ તેઓ પોતાના જ ગાયેલા જૂના ગીતો ખૂબ જ પ્રેમથી સાંભળતા હતા.
જે સમયગાળામાં ‘સ્વર કોકિલા’ લતા મંગેશકરનો આખી ફિલ્મ ઇન્ડસ્ટ્રી પર દબદબો હતો, તે સુવર્ણ કાળમાં સુમન કલ્યાણપુરે *પોતાના ઉત્કૃષ્ટ ગાયકીના જોરે એક ખાસ સ્થાન હાંસલ કર્યું હતું.* ઘણા શ્રોતાઓ તેમના અવાજની સરખામણી લતાજી સાથે પણ કરતા હતા. મોહમ્મદ રફી, મુકેશ અને મન્ના ડે જેવા દિગ્ગજો સાથેના તેમના ગીતો આજે પણ અમર છે.
તેમણે હિન્દી સિનેમાને અસંખ્ય સદાબહાર ગીતો આપ્યા છે, જેમાં ‘ના ના કરતે પ્યાર તુમ્હી સે’, ‘તુમને પુકારા ઔર હમ ચલે આયે’, ‘આજ કલ તેરે મેરે પ્યાર કે ચર્ચે’, ‘ના તુમ હમેં જાનો’ અને મોહમ્મદ રફી સાથેનું શાસ્ત્રીય ગીત *’અજહૂ ન આયે બાલમા સાવન બીતા જાયે’* મુખ્ય છે.
ગાયકી ક્ષેત્રે તેમના આ અજોડ પ્રદાન બદલ ભારત સરકાર દ્વારા વર્ષ ૨૦૨૩માં તેમને દેશના પ્રતિષ્ઠિત નાગરિક સન્માન *’પદ્મ ભૂષણ’* થી નવાજવામાં આવ્યા હતા. હિન્દી ઉપરાંત તેમણે મરાઠી, બંગાળી, ઓડિયા સહિતની અનેક ભાષાઓમાં ગીતો ગાયા હતા. મહારાષ્ટ્રના મુખ્યમંત્રી દેવેન્દ્ર ફડણવીસ સહિત દેશના અનેક રાજનેતાઓ અને કલાકારોએ તેમના નિધન પર ઊંડો શોક વ્યક્ત કર્યો છે.
આ અણધારી વિદાયથી સાવરકુંડલા શહેરમા પણ તેના અઢળક ચાહકોમા ભારે ગમગીનીનો માહોલ જોવા મળ્યો હતો. સાવરકુંડલાના અગ્રણી ચાહકો અને સંગીત પ્રેમીઓ સર્વશ્રી:
હરેશભાઈ મહેતા (પ્રમુખ વિદ્યાગુરુ ફાઉન્ડેશન)
ડો. પ્રકાશ કટારીયા (સુપ્રિટેન્ડેન્ટ લલ્લુભાઈ શેઠ આરોગ્ય મંદિર સા. કુ.,
મુકુંદભાઈ નાગ્રેચા
દીપકભાઈ શેઠ
વિનુભાઈ રાવળ
ડો. વડેરા સાહેબ
સંજયભાઈ મહેતા
અમરીશભાઈ સાદિયા
નંદલાલભાઈ સાદિયા
પત્રકાર બિપીનભાઈ પાંધી
દીપકભાઈ પાંધી,
અમિતગીરી ગોસ્વામી,
ગિરીશભાઈ વ્યાસ
યોગેશભાઈ પરમાર
પિયુષભાઈ દવે
રમેશભાઈ હીરાણી
પ્રણવભાઈ જોષી
હર્ષદભાઈ જોશી
રવિભાઈ મહેતા
સમેત અનેક સંગીત પ્રેમીઓએ ઘેરા શોકની લાગણી વ્યક્ત કરી સ્વરસમ્રાજ્ઞીને અશ્રુભીની શ્રદ્ધાંજલિ અર્પણ કરી છે.
Recent Comments