અમરેલી જિલ્લામાં આગામી 24 કલાક દરમિયાન ભારેથી અતિભારે વરસાદની શક્યતાને ધ્યાનમાં રાખીને હવામાન વિભાગે રેડ એલર્ટ જાહેર કર્યું છે. ભારે વરસાદ અને દરિયામાં પ્રતિકૂળ હવામાનની સ્થિતિને પગલે જાફરાબાદ બંદર પર 3 નંબરનું ચેતવણી સિગ્નલ લગાવવામાં આવ્યું છે. દરિયામાં ઊંચા મોજા, તેજ પવન અને જોખમી પરિસ્થિતિ સર્જાવાની સંભાવનાને કારણે તંત્ર દ્વારા માછીમારોને દરિયો ન ખેડવાની કડક સૂચના આપવામાં આવી છે.
જાફરાબાદના દરિયામાં કરંટ જોવા મળતા દરિયાકાંઠાના વિસ્તારોમાં પણ સાવચેતી વધારવામાં આવી છે. દરિયામાં રહેલી તમામ માછીમારી બોટોને સુરક્ષિત રીતે બંદર પર પરત ફરવા સૂચના આપવામાં આવી છે, જ્યારે માછીમારોને આગામી સૂચના સુધી દરિયામાં ન જવા અપીલ કરવામાં આવી છે.
જિલ્લા વહીવટી તંત્ર અને આપત્તિ વ્યવસ્થાપન વિભાગ દ્વારા નીચાણવાળા વિસ્તારો પર સતત નજર રાખવામાં આવી રહી છે. ભારે વરસાદને કારણે નદીઓ, નાળા અને જળાશયોમાં પાણીની આવક વધવાની શક્યતા હોવાથી લોકોને બિનજરૂરી મુસાફરી ટાળવા, પૂરગ્રસ્ત વિસ્તારોમાં ન જવા અને તંત્ર દ્વારા આપવામાં આવતી સૂચનાઓનું પાલન કરવાની અપીલ કરવામાં આવી છે.
હવામાન વિભાગની આગાહીને પગલે સમગ્ર જિલ્લામાં તકેદારીના પગલાં લેવામાં આવ્યા છે અને કોઈપણ આપત્તિજનક પરિસ્થિતિનો સામનો કરવા માટે સંબંધિત વિભાગોને એલર્ટ પર રાખવામાં આવ્યા છે.
Recent Comments