પાલીતાણા ટાઉન પોલીસની સરાહનીય કામગીરી: અકસ્માતમાં ઈજાગ્રસ્ત બાઈક સવારને સમયસર હોસ્પિટલ પહોંચાડી માનવતાનું ઉદાહરણ પૂરું પાડ્યું

પાલીતાણા ટાઉન પોલીસ ટીમ દ્વારા સમયસૂચકતા અને માનવતાનું ઉત્તમ ઉદાહરણ પૂરું પાડતી સરાહનીય
કામગીરી સામે આવી છે. તળાજા રોડ પર વિરાયતન સ્કૂલ નજીક અકસ્માતમાં ઈજાગ્રસ્ત થયેલા બાઈક
સવારને પોલીસે તાત્કાલિક હોસ્પિટલ પહોંચાડી સમયસર સારવાર અપાવવામાં મહત્વની ભૂમિકા ભજવી
હતી.
મળતી વિગતો અનુસાર, પાલીતાણા ટાઉન પોલીસનો સ્ટાફ વિસ્તારમાં પેટ્રોલિંગમાં હતો. દરમિયાન તળાજા
રોડ પર વિરાયતન સ્કૂલ નજીક એક બાઈક સવારને અકસ્માત નડ્યો હોવાની જાણ થતાં ઈમરજન્સી સેવા
112ની પોલીસ વાન તાત્કાલિક ઘટનાસ્થળે પહોંચી હતી.
અકસ્માતમાં ઈજાગ્રસ્ત બાઈક સવારને તાત્કાલિક સારવારની જરૂરિયાત જણાતા પોલીસે એમ્બ્યુલન્સની રાહ
જોયા વિના સમયસૂચકતા દાખવી ઈજાગ્રસ્તને વધુ સારવાર માટે તાત્કાલિક હોસ્પિટલ ખસેડવાની વ્યવસ્થા
કરી હતી.
પોલીસની આ ત્વરિત કામગીરી, ફરજ પ્રત્યેની નિષ્ઠા અને માનવતાભર્યા અભિગમને કારણે ઈજાગ્રસ્ત
વ્યક્તિને સમયસર તબીબી સારવાર મળી શકી હતી. અકસ્માત જેવી ગંભીર પરિસ્થિતિમાં પોલીસ દ્વારા
દાખવવામાં આવેલી આ સતર્કતાની સ્થાનિક લોકો દ્વારા પ્રશંસા કરવામાં આવી રહી છે.
પાલીતાણા ટાઉન પોલીસની આ કામગીરી એ દર્શાવે છે કે પોલીસ માત્ર કાયદો અને વ્યવસ્થા જાળવવા
પૂરતી મર્યાદિત નથી, પરંતુ મુશ્કેલીના સમયે નાગરિકોની મદદ માટે પણ હંમેશા તત્પર રહે છે.