સાવરકુંડલા નગરપાલિકા વિસ્તારમાં આવેલા વોર્ડ નં. ૮ના રહેવાસીઓ હાલ પીવાના પાણીમાં ગટરનું દૂષિત પાણી ભળવાની ગંભીર સમસ્યા અને ભયનો સામનો કરી રહ્યા છે. આ અંગે સ્થાનિક રઘુવંશી અગ્રણી હિરેન સુચક દ્વારા સાવરકુંડલા નગરપાલિકાના પ્રમુખશ્રીને એક લેખિત રજૂઆત કરી તાત્કાલિક તપાસ અને મરામતની માગ કરવામાં આવી છે.
સ્થાનિક મહિલાઓ અને નાગરિકોના આરોગ્ય પર તોળાતા જોખમને ધ્યાને રાખીને પ્રમુખશ્રી ઉપરાંત સ્થાનિક ધારાસભ્ય શ્રી મહેશભાઈ કસવાલા, સાંસદ શ્રી ભરતભાઈ સુતરીયા, ચીફ ઓફિસર, મામલતદાર તેમજ અમરેલી કલેક્ટરશ્રીને પણ આ અંગેની નકલ રવાના કરીને ઉચ્ચ સ્તરે રજૂઆત પહોંચાડવામાં આવી છે.
રજૂઆતમાં કરવામાં આવેલી મુખ્ય માગણીઓ આ મુજબ છે
વોર્ડ નં. ૮માંથી પીવાના પાણીના સેમ્પલ લઈ તાત્કાલિક લેબોરેટરી ટેસ્ટ કરવામાં આવે.
મૂળ કારણની તલસ્પર્શી તપાસ કરવા માટે પાણી-ગટરની લાઈન, ટાંકી, વાલ્વ અને કનેક્શન્સ તપાસી દૂષણ ફેલાવતા સ્ત્રોતને શોધી તેની મરામત કરવામાં આવે. પ્રશ્નનો કાયમી ઉકેલ ન આવે ત્યાં સુધી નાગરિકો માટે ટેન્કર દ્વારા શુદ્ધ પાણી પૂરું પાડવાની વ્યવસ્થા ગોઠવવામાં આવે. દૂષિત પાણીથી કોઈ નાગરિક બીમાર ન પડે તે માટે આરોગ્ય વિભાગ દ્વારા જરૂરી તબીબી તપાસ અને સારવાર સુનિશ્ચિત કરવામાં આવે. માત્ર આશ્વાસન આપવાને બદલે શુદ્ધ પાણી પૂરું પાડવાની ચોક્કસ તારીખ અને કાયમી યોજના જાહેર કરવામાં આવે.
સ્વચ્છ પાણી એ નાગરિકોનો મૂળભૂત અધિકાર હોઈ, તંત્ર દ્વારા આ જાહેર આરોગ્યના સંવેદનશીલ મુદ્દાને પ્રાથમિકતા આપીને તાત્કાલિક પગલાં ભરવામાં આવે તેવી ઉગ્ર માગ ઊઠી છે.
વાત જાણે એમ છે કે આ વોર્ડ નંબર ૮ એટલે નગરપાલિકા પ્રમુખશ્રીનો વિસ્તાર અને આ વિસ્તારમાં જ જો આવી પરિસ્થિતિ હશે તો એ કેવી કરુણતા ગણાય.. એવી પણ લોકમુખે ચર્ચા થઈ રહી છે
Recent Comments