નિયામકશ્રી-આયુષની કચેરી (ગુજરાત રાજ્ય) અને જિલ્લા આયુર્વેદ અધિકારીશ્રી-અમરેલીના માર્ગદર્શન હેઠળ, તેમજ રાષ્ટ્રીય સ્વયંસેવક સંઘ સંચાલિત ‘ડૉક્ટર હેડગેવાર સેવા સમિતિ-સાવરકુંડલા’ના સહયોગથી, સરકારી આયુર્વેદ દવાખાનું (ઘોબા, તા. સાવરકુંડલા) દ્વારા દર માસના ચોથા બુધવારે યોજાતા આયુર્વેદિક કેમ્પની શ્રેણી અંતર્ગત વિશેષ નિદાન તથા સારવાર કેમ્પનું સુંદર આયોજન કરવામાં આવ્યું હતું.આજરોજ તારીખ ૨૨/૦૭/૨૦૨૬ ને બુધવારના રોજ સાવરકુંડલાના હાથસણી રોડ સ્થિત શ્રી ઉતાવળા હનુમાન મંદિર ખાતે આયોજિત આ સર્વરોગ આયુર્વેદ કેમ્પમાં સ્થાનિક તેમજ આસપાસના વિસ્તારના બહોળી સંખ્યામાં દર્દીઓ અને ગ્રામજનોએ હાજરી આપીને સ્વાસ્થ્ય સેવાઓનો લાભ લીધો હતો.
કેમ્પ દરમિયાન ઉપસ્થિત લાભાર્થીઓને કેવળ નિદાન અને વિનામૂલ્યે ઔષધ સારવાર જ નહીં, પરંતુ આયુર્વેદના મૂળભૂત સિદ્ધાંતો જેવાં કે સ્વસ્થ જીવનશૈલી માટેની ‘દિનચર્યા’ અને બદલાતી ઋતુઓ પ્રમાણે રાખવાની થતી કાળજી અંગે **’ઋતુચર્યા’**નું વિશેષ માર્ગદર્શન પણ પૂરું પાડવામાં આવ્યું હતું.
આ માનવસેવાના યજ્ઞમાં વૈદ્ય કૌશલ ગોંડલીયા તેમજ પંકજભાઈ વ્યાસ, કૌશિકભાઈ બોરીસાગર, હિરેનભાઈ ડાભી, અરજણભાઈ, પિયુષભાઈ વરિયા, વિપુલભાઈ કનાડીયા અને નટુભાઈ રાજ્યગુરુ સહિતના અગ્રણીઓ અને સેવાભાવી કાર્યકરોએ નિષ્ઠાપૂર્વક પોતાની સેવાઓ આપી કેમ્પને સફળ બનાવ્યો હતો.
Recent Comments