સાવરકુંડલામાં ‘જયા પાર્વતી વ્રત’નો શ્રદ્ધાભેર પ્રારંભ:કન્યાઓ અને સૌભાગ્યવતી સ્ત્રીઓમાં ભારે ઉત્સાહ.

ધાર્મિક અને સાંસ્કૃતિક પરંપરાઓ માટે જાણીતા સાવરકુંડલા શહેરમાં આજથી પવિત્ર *‘જયા પાર્વતી વ્રત’* નો ભારે હર્ષોલ્લાસ અને શ્રદ્ધાપૂર્વક પ્રારંભ થયો છે. અષાઢ મહિનાના શુક્લ પક્ષની તેરસથી શરૂ થતાં આ ૫ દિવસના આકરા વ્રતને લઈને શહેરની વિવાહિત મહિલાઓ અને કુંવારિકાઓમાં ભારે ઉત્સાહ જોવા મળી રહ્યો છે. પ્રભાતે મંદિરો અને ઘરોમાં ‘ઓમ નમઃ શિવાય’ના નાદ સાથે વ્રતધારીઓએ પૂજા-અર્ચના કરી હતી.

​શાસ્ત્રોક્ત માન્યતા મુજબ, આ વ્રત પરણિત મહિલાઓ પોતાના પતિના દીર્ઘાયુ, ઉત્તમ સ્વાસ્થ્ય અને અખંડ સૌભાગ્યની કામના માટે કરે છે; જ્યારે કુંવારી કન્યાઓ સંસ્કારી, ગુણવાન અને મનગમતો પતિ મેળવવાની ઈચ્છા સાથે આ આકરું વ્રત રાખે છે. પરિવારમાં સુખ-શાંતિ અને સંતતિ સુખની પ્રાપ્તિ માટે પણ મા પાર્વતી અને દેવાધિદેવ મહાદેવની આરાધના કરવામાં આવી રહી છે.

​વ્રતના પ્રથમ દિવસે આજે વહેલી સવારે સ્નાનાદિથી નિવૃત્ત થઈને સાવરકુંડલાના વ્રતધારીઓએ શિવ-પાર્વતીનું સ્થાપન કરી જળ, દૂધ, બિલિપત્ર અને કંકુ વડે પૂજા કરી હતી.  આ પાંચેય દિવસ નિત્ય કથા-શ્રવણ અને પૂજન કરવામાં આવશે.

​આ વ્રત અત્યંત કઠિન ગણાય છે કારણ કે તે સંપૂર્ણપણે ‘અલૂણાં’ (મીઠા વગરનું) હોય છે. ૫ દિવસ સુધી ખોરાકમાં મીઠું, મરચું કે શાકભાજી લેવાની મનાઈ હોય છે. કન્યાઓ અને મહિલાઓ કેવળ દૂધ, ફળ અથવા મીઠા વગરના લોટમાંથી બનેલી વાનગીઓ (જેમ કે મોળી પૂરી કે શીરો) ગ્રહણ કરીને સતત ૫ દિવસ સુધી તપશ્ચર્યા કરશે.

​વ્રતના પાંચમા દિવસે શહેરમાં ખાસ રાત્રિ જાગરણનું આયોજન થશે, જેમાં વ્રતધારી કન્યાઓ અને સ્ત્રીઓ આખી રાત જાગીને શિવ ભજનો, ગરબા અને સાંસ્કૃતિક રમતો રમીને જાગરણ પૂરું કરશે. છઠ્ઠા દિવસે સવારે વિધિવત પૂજા-આરતી બાદ  દાન-દક્ષિણા આપ્યા બાદ મીઠાવાળો ખોરાક લઈને પારણા કરવામાં આવશે.

​સાવરકુંડલાનું વાતાવરણ હાલ શિવ-શક્તિની આરાધનાથી ભક્તિમય બની ગયું છે.