સાવરકુંડલા સ્થિત ‘કુંડલા તાલુકા ગ્રામ સેવા મંડળ’ (ખાદી કાર્યાલય) ખાતે ગુરુપૂર્ણિમાના પવિત્ર પર્વ પ્રસંગે એક વિશેષ પૂનમ બેઠક અને શ્રદ્ધાંજલિ સંમેલનનું ભાવસભર વાતાવરણમાં ભવ્ય આયોજન કરવામાં આવ્યું હતું.
સંસ્થાના આદ્ય સ્થાપકો સ્વ. કેશુભાઈ ભાવસાર, સ્વ. અમુલખભાઈ ખીમાણી અને સ્વ. લલ્લુભાઈ શેઠે શરૂઆતના બે દસકા સુધી પૂનમ મીટિંગના માધ્યમથી સંસ્થાને માર્ગદર્શન પૂરું પાડ્યું હતું. ત્યારબાદના બે દસકા સુધી સ્વ. નીમુબેન શેઠ, સ્વ. મનુભાઈ મહેતા અને સ્વ. હર્ષદભાઈ ત્રિવેદીનું પ્રેરણાદાયી માર્ગદર્શન મળતું રહ્યું હતું. આ તમામ રાહબરોની નિષ્ઠાપૂર્વકની સેવાઓને વંદન કરી, તેમના રચનાત્મક વિચારો અને પૂનમ મીટિંગની પરંપરાને આગળ ધપાવવાના ઉદ્દેશ્યથી આ વિશેષ ગુરુપૂર્ણિમા સભાનું આયોજન કરાયું હતું.
પ્રાર્થના અને ભજનોથી ભક્તિમય વાતાવરણ
કાર્યક્રમની મંગળ શરૂઆત શ્રી જે. વી. મોદી હાઈસ્કૂલના શિક્ષક શ્રી સંજયભાઈ મહેતા અને તેમના વિદ્યાર્થીઓ દ્વારા પ્રસ્તુત કરવામાં આવેલી સુંદર પ્રાર્થના, ધૂન અને ભજનો દ્વારા થઈ હતી. વિદ્યાર્થીઓના સૂરમય ગાનથી સમગ્ર વાતાવરણ ભક્તિમય બની ગયું હતું.
આ કાર્યક્રમનું અધ્યક્ષ સ્થાન સૌરાષ્ટ્ર રચનાત્મક સમિતિ (રાજકોટ) તથા કુંડલા તાલુકા ગ્રામ સેવા મંડળના પ્રમુખશ્રી હિંમતભાઈ ગોડાએ સંભાળ્યું હતું. અધ્યક્ષ સ્થાનેથી બોલતા શ્રી હિંમતભાઈ ગોડા તેમજ અન્ય અતિથિઓએ ગાંધીજીના રચનાત્મક વિચારો, ખાદીનું મહત્વ અને સમાજસેવાની ભાવના પર પ્રેરક વક્તવ્ય આપ્યું હતું. વર્તમાન સમયમાં ગાંધી મૂલ્યોને જીવનમાં ઉતારીને ગ્રામસેવા અને રચનાત્મક પ્રવૃત્તિઓને વધુ વેગવંતી બનાવવાનો સંકલ્પ વ્યક્ત કરવામાં આવ્યો હતો.
આ પવિત્ર પ્રસંગે માનવમંદિરના પ.પૂ. સંત શ્રી ભક્તિરામબાપુ તેમજ ધારાસભ્યશ્રી મહેશભાઈ કસવાલા વિશેષ ઉપસ્થિત રહ્યા હતા અને પોતાના પ્રેરક આશીર્વચન પાઠવ્યા હતા.
કાર્યક્રમમાં કુંડલા ગ્રામ સેવા મંડળના મંત્રી શ્રી રાજેન્દ્રભાઈ ખીમાણી, શ્રી વિનુભાઈ રાવલ, કાર્યાલય મંત્રી શ્રી હર્ષદભાઈ ત્રિવેદી (હર્ષદરાય છેલશંકર ત્રિવેદી) સહિતના હોદ્દેદારો, સ્થાનિક અગ્રણીઓ, ખાદી પ્રેમીઓ અને સંસ્થાના કાર્યકરો બહોળી સંખ્યામાં ઉપસ્થિત રહ્યા હતા.
કાર્યક્રમના અંતે સભામાં ઉપસ્થિત સૌ લોકોએ સાથે મળીને પ્રેમપૂર્વક ભોજન-પ્રસાદ ગ્રહણ કર્યો હતો.
Recent Comments