અમરેલીમાં આવતીકાલથી 'સરસ મેળો - ૨૦૨૬'નો ભવ્ય પ્રારંભ: નારી શક્તિ અને સ્વદેશી કલાનો સંગમ

અમરેલીના ચિતલ રોડ સ્થિત નૂતન હાઈસ્કૂલના ગ્રાઉન્ડ ખાતે આવતીકાલ તારીખ ૨૮ ઓક્ટોબર ૨૦૨૬થી 'સરસ મેળો - ૨૦૨૬' નો ભવ્ય પ્રારંભ થવા જઈ રહ્યો છે. ગ્રામ વિકાસ વિભાગ, ગુજરાત સરકાર અંતર્ગત ગુજરાત લાઈવલીહૂડ પ્રમોશન કંપની લિ. (GLPC) દ્વારા આયોજિત આ મેળાનું ઉદ્ઘાટન સવારે ૦૯:૦૦ કલાકે મહાનુભાવોના હસ્તે કરવામાં આવશે.

આ પ્રદર્શન-સહ-વેચાણ મેળાનો મુખ્ય ઉદ્દેશ્ય "સર્જન તેના હાથનું, સફળતા તેના પરિશ્રમની, આત્મનિર્ભર નારી, શાન ભારતની" ના મંત્ર સાથે મહિલા સખી મંડળો અને ગ્રામીણ કલાકારોને પ્લેટફોર્મ પૂરું પાડવાનો છે. સરસ મેળામાં અમરેલી જિલ્લાની બહેનો દ્વારા તૈયાર કરાયેલી પરંપરાગત હસ્તકલા, અદભુત ભરતકામ, માટીના કલાત્મક વાસણો, હેન્ડલૂમ વસ્ત્રો તેમજ શુદ્ધ ગૃહ ઉદ્યોગની ખાદ્ય સામગ્રી અને ઓર્ગેનિક ઉત્પાદનોના આકર્ષક સ્ટોલ્સ ઉભા કરવામાં આવ્યા છે. વડાપ્રધાનના 'વોકલ ફોર લોકલ' અને 'સ્વદેશી સે પ્રગતિ' ના સંકલ્પને વેગ આપતો આ મેળો આગામી ૦૪ નવેમ્બર ૨૦૨૬ સુધી નાગરિકો માટે ખુલ્લો રહેશે.

આત્મનિર્ભરતા એટલે પોતાની શક્તિ, બુદ્ધિ અને પરિશ્રમ પર ભરોસો રાખીને સ્વાવલંબી બનવું. કોઈપણ દેશ, સમાજ કે વ્યક્તિ માટે પ્રગતિના પંથે આગળ વધવા માટે આત્મનિર્ભરતા એ પહેલી શરત છે, કારણ કે પરાવલંબન હંમેશા લાચારી લાવે છે જ્યારે આત્મનિર્ભરતા ગૌરવ અને આત્મવિશ્વાસ આપે છે. આજે જ્યારે આપણો દેશ 'વોકલ ફોર લોકલ' ના મંત્ર સાથે આગળ વધી રહ્યો છે, ત્યારે સ્થાનિક કલાકારો, નાના ઉદ્યોગો અને ખાસ કરીને નારી શક્તિનો પરિશ્રમ આત્મનિર્ભર ભારતની સાચી શાન બની રહ્યો છે. જ્યારે વ્યક્તિ પોતે મહેનત કરીને આર્થિક અને સામાજિક રીતે પગભર થાય છે, ત્યારે તે માત્ર પોતાનો જ નહીં પરંતુ સમગ્ર રાષ્ટ્રના વિકાસનો મજબૂત પાયો બને છે.