શ્રી નૂતન કેળવણી મંડળ સંચાલિત અને સૌરાષ્ટ્ર યુનિવર્સિટી, રાજકોટ સંલગ્ન શ્રીમતી વી.ડી. ઘેલાણી મહિલા આર્ટસ કોલેજ ખાતે આજરોજ તારીખ ૨૯ જુલાઈના રોજ ‘ગુરુપૂર્ણિમા’ પર્વની ખૂબ જ ધામધૂમથી અને ભક્તિસભર વાતાવરણમાં ઉજવણી કરવામાં આવી હતી.
કાર્યક્રમની શરૂઆતમાં જ કોલેજ પરિવારમાં એક ઉત્સવનો માહોલ જોવા મળ્યો હતો. વિદ્યાર્થીની બહેનો ઉપાસના વીંછીયા, ભાર્ગવી રાઠોડ અને શિવાની સરવૈયા દ્વારા આજના પાવન પર્વને અનુલક્ષીને અત્યંત આકર્ષક અને સુંદર રંગોળીઓ બનાવવામાં આવી હતી.
કાર્યક્રમના પ્રારંભે ડો. પ્રતિમા શુક્લએ ગુરુપૂર્ણિમાના પાવન દિવસનું મહાત્મ્ય સમજાવીને સમગ્ર કાર્યક્રમની સુંદર રૂપરેખા રજૂ કરી હતી. આ પ્રસંગે ગુરુવંદનાના ભાગરૂપે વિદ્યાર્થીની અસ્મિતા અને પ્રાર્થના દ્વારા ગુરુજનોને કંકુ, ચોખા અને પુષ્પો અર્પણ કરી ભાવપૂર્વક પૂજન-વંદન કરવામાં આવ્યા હતા.
અતિ ઉત્સાહપૂર્વક યોજાયેલા આ કાર્યક્રમમાં વિદ્યાર્થીનીઓ માટે ભજન, ગઝલ, વક્તવ્ય તેમજ ચિત્ર સ્પર્ધાનું આયોજન કરવામાં આવ્યું હતું. જેમાં હિરલ અને નીપાએ પોતાના મધુર કંઠે સુંદર ભજનો રજૂ કર્યા હતા, જ્યારે ખુશ્બુ દ્વારા ભાવવાહી ગઝલ પેશ કરવામાં આવી હતી.
કોલેજના કાર્યકારી આચાર્યશ્રી ડી. એલ. ચાવડાએ આજના પાવન પ્રસંગે તમામ વિદ્યાર્થીની બહેનોને આશીર્વચન પાઠવ્યા હતા અને તેઓ જીવનમાં ઉત્તરોત્તર પ્રગતિ કરી સફળતાના શિખરો સર કરે તેવી શુભકામનાઓ વ્યક્ત કરી હતી.
સમગ્ર કાર્યક્રમનું ઉત્કૃષ્ટ અને સુચારૂ સંચાલન વિદ્યાર્થીનીઓ જાદવ મહેક અને વાઘેલા આસ્તાના દ્વારા કરવામાં આવ્યું હતું. કાર્યક્રમના અંતમાં પ્રા. કે. બી. પટેલ સાહેબે ઉપસ્થિત સૌનો આભાર વ્યક્ત કર્યો હતો. આ કાર્યક્રમને સફળ બનાવવા માટે કોલેજના સમગ્ર સ્ટાફ પરિવારનો પૂરતો સહયોગ સાંપડ્યો હતો.
Recent Comments