સાવરકુંડલામાં રેલવે સ્ટેશને અધુરા કામ તાત્કાલિકપૂર્ણ કરવા મુસાફરોની માગણી

સાવરકુંડલાના રેલવે સ્ટેશનને બે વર્ષ પહેલા આધુનિક બનાવવાની જાહેરાતો સાથે તેના કામનો પ્રારંભ થયો હતો. પરંતુ છેલ્લા એક વર્ષથી અચાનક જ આ કામ બંધ જેવી સ્થિતિમાં જોવા મળે છે. મુસાફરોને બેસવા માટેની પૂરતી વ્યવસ્થા નથી, રેલવે ટ્રેક પરના ઓવરબ્રિજનું કામ અધૂરું છે. ફાટક મુક્ત રેલવે અંતર્ગત સાવરકુંડલા મુકામે ચાલતું ફલાય ઓવર બ્રિજની કામગીરી પણ ધીમી ગતિએ આગળ વધી રહી છે. આ મહાકાય રેલવે સ્ટેશનને ત્રણ દરવાજાઓ આપેલા છે પરંતુ પ્રથમ દરવાજેથી પ્રવેશ કરતા કામ સંપૂર્ણ પણે અધૂરું દેખાઈ રહ્યું છે. પ્લેટફોર્મ પર મુસાફરો માટે જે બેસવાની સુવિધાઓ જોઈએ તે જરૂરી અને યોગ્ય અને પર્યાપ્ત નથી. અહીં રોજના ૪૦૦થી ૫૦૦ જેટલા મુસાફરો આવે છે, જેમાં વૃદ્ધો અને બાળકો પણ હોય છે. આ સુવિધાઓ બાબતે અનેક વખત અધિકારીઓ અને પદાધિકારીઓએ નિરીક્ષણ કર્યું છે અને ટૂંક સમયમાં પૂર્ણ કરવા માટેની સૂચનાઓ આપવામાં આવી છે છતાં તે મુજબ કામ પૂર્ણ થયું નથી. વાતો અને સૂચનો જાણે ખાલી કાગળ ઉપર જ રહી જતા હોય તેવું પ્રથમ દ્રષ્ટિએ લાગે છે. આથી મુસાફરોની માગણી છે કે, જો યોગ્ય ઝડપે કામ ન થતું હોય તો એજન્સીઓ બદલીને પણ તાત્કાલિક અને સંતોષકારક રીતે આ કામ પૂર્ણ કરવામાં આવે.