બાઢડા કેળવણી મંડળ સંચાલિત શ્રી એચ. એન. વિરાણી હાઈસ્કૂલના ધોરણ-૧૦ ના તેજસ્વી વિદ્યાર્થી બોરીસાગર ભાર્ગવ બકુલભાઈ (વતન: જાબાળ) એ રાજ્યકક્ષાએ અસાધારણ સિદ્ધિ પ્રાપ્ત કરીને સમગ્ર પંથકનું ગૌરવ વધાર્યું છે.
ગુજકોસ્ટ, DST (ગુજરાત સરકાર) પ્રાયોજિત ડિસ્ટ્રિક્ટ કમ્યુનિટી સાયન્સ સેન્ટર,અમરેલી દ્વારા આયોજિત ‘નેશનલ સ્ટેમ્પ ક્વિઝ 4.0’ માં ભાર્ગવે ઝોનલ કક્ષાએ સફળતા મેળવી રાજ્યકક્ષાએ પસંદગી પામી છે. આ સિદ્ધિ બદલ ગાંધીનગર ગુજકોસ્ટ દ્વારા તેને પ્રોત્સાહનરૂપે સેમસંગ કંપનીનું ટેબલેટ ઈનામ આપી સન્માનિત કરવામાં આવ્યો છે.
નાની ઉંમરે પિતાની છત્રછાયા ગુમાવનાર ભાર્ગવ અત્યંત સામાન્ય પરિસ્થિતિમાંથી આવે છે. તેની માતા દિવસ-રાત ખેતીકામ કરીને ઘરનું ગુજરાન ચલાવે છે અને દીકરાને ભણાવે છે. માતાની આ કાળી મજૂરી અને ત્યાગ સામે ભાર્ગવની મહેનત રંગ લાવી છે.
શાળાના માર્ગદર્શક શિક્ષક દિલીપભાઈ રાઠોડ સરની દેખરેખ હેઠળ ભાર્ગવે આ સફળતા મેળવી છે. પર્વત જેવડી મુશ્કેલીઓ વચ્ચે વિદ્યાર્થીએ મેળવેલી આ સિદ્ધિ બદલ શાળાના પ્રમુખશ્રી કાળુભાઈ વિરાણી, આચાર્યશ્રી ડો. મધુરભાઈ પી. બગડા તથા સમગ્ર શાળા પરિવારે ભાર્ગવને ખૂબ-ખૂબ અભિનંદન પાઠવી તેના ઉજ્જવળ ભવિષ્ય માટે શુભકામનાઓ વ્યક્ત કરી છે.
Recent Comments