અમરેલી જિલ્લામાં અતિવૃષ્ટિના કારણે અનેક ગામોમાં જનજીવન પ્રભાવિત બન્યું છે. આવી સ્થિતિ વચ્ચે રાજ્યના મંત્રી કૌશિક વેકરિયા અને ધારાસભ્ય જે. વી. કાકડિયાએ આજે અમરેલી જિલ્લાના ગરમલી ગામની મુલાકાત લઈને વરસાદથી થયેલા નુકસાનની સ્થળ પર સમીક્ષા કરી હતી. તેમની સાથે વહીવટી તંત્રના અધિકારીઓ પણ ઉપસ્થિત રહ્યા હતા.
મંત્રી અને ધારાસભ્યએ ગામના પ્રભાવિત વિસ્તારોનું નિરીક્ષણ કરીને સ્થાનિક ગ્રામજનો સાથે સીધી વાતચીત કરી હતી. ભારે વરસાદના કારણે ખેતીના પાક, રહેણાંક મકાનો, ગ્રામ્ય માર્ગો, પાણી ભરાવાની સ્થિતિ તેમજ અન્ય જાહેર સુવિધાઓને થયેલા નુકસાન અંગે વિગતવાર માહિતી મેળવી હતી. ગ્રામજનોએ પોતાની મુશ્કેલીઓ અને માંગણીઓ રજૂ કરતાં બંને જનપ્રતિનિધિઓએ તેને ગંભીરતાથી સાંભળી હતી.
મુલાકાત દરમિયાન અધિકારીઓ સાથે સ્થળ પર જ સમીક્ષા બેઠક યોજાઈ હતી. અસરગ્રસ્ત પરિવારોનું નુકસાનનું સર્વેક્ષણ ઝડપથી પૂર્ણ કરવા, પાત્ર લોકોને સરકારની સહાય અને વળતર સમયસર ઉપલબ્ધ કરાવવા તેમજ ગામમાં જરૂરી સુવિધાઓને ઝડપથી પૂર્વવત્ કરવા માટે સંબંધિત વિભાગોને જરૂરી સૂચનાઓ આપવામાં આવી હતી.
મંત્રી કૌશિક વેકરિયાએ જણાવ્યું હતું કે રાજ્ય સરકાર અતિવૃષ્ટિથી પ્રભાવિત દરેક પરિવારની સાથે છે અને કોઈપણ નાગરિકને મુશ્કેલી ન પડે તે માટે તંત્ર સતત કાર્યરત છે. જ્યારે ધારાસભ્ય જે.વી. કાકડિયાએ પણ સ્થાનિક પ્રશ્નોનો સત્વરે ઉકેલ આવે અને વિકાસલક્ષી કામગીરીમાં કોઈ વિલંબ ન થાય તે માટે અધિકારીઓને સંવેદનશીલ અને ઝડપી કામગીરી કરવા સૂચના આપી હતી.
પ્રશાસન દ્વારા અસરગ્રસ્ત વિસ્તારોમાં સતત નજર રાખવામાં આવી રહી છે અને લોકોની સુરક્ષા, રાહત તથા પુનઃસ્થાપન કામગીરીને પ્રાથમિકતા આપવામાં આવી રહી હોવાનું પણ મુલાકાત દરમિયાન જણાવાયું હતું.
Recent Comments