એગ્રીસ્ટેક પ્રોજેક્ટ-ખેડૂતો માટે ફાર્મર આઈ.ડી. – પી.એમ.કિસાન યોજનાના લાભાર્થીઓએ તા.૨૫ નવેમ્બર પહેલાં નોંધણી કરાવવી

એગ્રીસ્ટેક પ્રોજેક્ટ અંતર્ગત ભારત અને ગુજરાત સરકારના સંયુક્ત પ્રયાસોથી ફાર્મર રજીસ્ટ્રી હેઠળ ખેડૂતોને આધાર આઈ.ડી.ની જેમ ફાર્મર આઈ.ડી.મળશે. રાજ્યમાં તા.૧૫ ઓક્ટોબર, ૨૦૨૪થી ખેડૂત નોંધણી શરુ છે. પી.એમ.કિસાન યોજના તળે આગામી ડિસેમ્બરના હપ્તા માટે ભારત સરકાર દ્વારા ખેડુત આઈ.ડી.ની નોંધણી ફરજિયાત છે.પી.એમ.કિસાન યોજનાના લાભાર્થીએ આ લાભ મેળવવા તા.૨૫ નવેમ્બર,૨૦૨૪ પહેલા નોંધણી કરાવવી. વેબપોર્ટલથી દરેક ગ્રામ પંચાયત કચેરીમાં નોંધણી થશે અને વધુમાં ખેડુત જાતે પણ આ નોંધણી કરી શકશે.રાજ્યના તમામ ખેડૂતોએ ખેડૂત આઈ.ડી.ની નોંધણી ફરજિયાત કરવી, ખોટી નોંધણી રદ થશે. ફાર્મર રજીસ્ટ્રી હેઠળ ખેડૂતોને આંગળીના ટેરવે ખેતીવાડીલક્ષી તમામ ધિરાણ સબંધી લાભ સરળતાથી મળશે.આ બાબતે ખેડૂતોએ આધાર કાર્ડ,આધાર કાર્ડ સાથે લીંક મોબાઈલ નંબર અને ૮-અ નકલ, ૭-૧૨ નકલની વિગત સાથે વધુ વિગતો માટે ગ્રામ્ય કક્ષાએ સંબંધિત ગ્રામ પંચાયત કચેરીના વિલેજ કમ્પ્યુટર એન્ટરપ્રિન્યોર (વિ.સી.ઇ.)નો સંપર્ક કરવો.ખેડૂતમિત્રો પોતે જાતે પણ ખેડૂત નોંધણી કરી શકે તે માટે ગુગલ પ્લે સ્ટોરમાંથી લીંક દ્વારા એગ્રીસ્ટેકની એપ્લીકેશન ડાઉનલોડ કરી નોંધણી કરી શકશે.વધુ જાણકારી માટે ગામના તલાટી કામ મંત્રી/સીટી તલાટી(કસ્બા તલાટી) તેમજ તાલુકા કક્ષાએ તાલુકા વિકાસ અધિકારીશ્રી/મામલતદારશ્રીનો સંપર્ક કરવા અમરેલી જિલ્લા ખેતીવાડી અધિકારીશ્રીએ એક યાદીમાં જણાવ્યું છે.