સાવરકુંડલા અને લીલીયા તાલુકામાં ફટાકડા વેચાણલાયસન્સ મેળવવા તા.૧૫ સપ્ટેમ્બર સુધીમાં અરજી કરવી

અમરેલી, તા.૨૬ ઓગસ્ટ, ૨૦૨૫ (મંગળવાર) સરકારની વખતો વખતની માર્ગદર્શિકા મુજબ ફટાકડા વેચાણ લાયસન્સ મેળવવું આવશ્યક છે.

આગામી સમયમાં આવતા દિવાળીનાં તહેવાર દરમિયાન સાવરકુંડલા સબ ડિવિઝનમાં આવેલા સાવરકુંડલા તેમજ લીલીયા તાલુકામાં હંગામી (ટેમ્પરરી) ફટાકડા (દારુખાનુ) રાખવા તથા વેચાણ કરવા માંગતા હોય તેમણે જરુરી આધાર પુરાવા સાથે તા.૧૫- ૦૯- ૨૦૨૫ સુધીમાં અરજી કરવી.

ફટાકડા (દારુખાનુ) રાખવા તથા વેચાણ માટે સુરક્ષિત મકાનમાં અને ફટાકડા (દારુખાનુ) સળગી ન ઉઠે તે રીતે ત્રણ બાજુથી બંધ હોય તેવા સિમેન્ટ કે ગેલ્વેનાઈઝનાં પતરાનો કામચલાઉ શેડ કરવાનો રહે છે. 

ફટાકડા (દારુખાનુ) રાખવા નિયત થાય તે જગ્યા પર આ શેડ તૈયાર કરી ફટાકડા (દારુખાનુ) રાખવા તથા વેચાણ કરવા માટે નિયત નમૂના નં.એલ.ઈ.૦૫ ફોર્મ નં.એ.ઈ.૦૫ માં અરજી કરી લાયસન્સ મેળવવું ફરજિયાત છે.

આથી, લાયસન્સ મેળવવા માંગતા હોય તેમણે નિયત નમૂનાનું ફોર્મ ત્રણ નકલમાં સાવરકુંડલા સબ ડિવિઝનલ મેજિસ્ટ્રેટશ્રીની (પ્રાંત) કચેરી ખાતે તા.૧૫/૦૯/૨૦૨૫ સુધીમાં  મોકલવું.

નિયત નમૂના અરજી ફોર્મ નં.એ.ઈ.૦૫ માં  અરજી કરવા સાથે તમામ વિગતો સચોટ રીતે  સુવાચ્ય હોય તેમ કરવું.

અરજી પર અરજદારશ્રીએ પાસપોર્ટ સાઈઝનો તાજેતરનો એક ફોટોગ્રાફ  અને અરજી પર રુ.૦૩ ની કોર્ટ ફી સ્ટેમ્પ અચૂક લગાડવા.

અરજી પર લાઈસન્સ ફી રૂા.૯૦૦/- (અંકે રૂપિયા નવસો પૂરા) “૦૦૭૦-૬૦-૧૦૩-૦૦” (અન્ય વહીવટી સેવાઓ, રિસિપ્ટ અંડર એકસ્પ્લોઝીવ્સ એકટ વિગેરે) સદરે ચલણથી સરકારશ્રીમાં જમા કરાવી અરજી સાથે અસલ ચલણ ફરજિયાત સામેલ રાખવું.

અરજદારશ્રીએ સૂચિત સ્થળનાં બ્લુ પ્રિન્ટ નકશામાં સહી કરી અરજી સાથે ૦૩ (ચાર) નકલમાં અને સૂચિત સ્થળ માલિકી / ભાડા હકકે ધરાવતાં હોવા અંગેનાં આધાર પુરાવાઓ બિનચૂક સામેલ રાખવાના રહેશે. તેમ સાવરકુંડલા સબ ડિવિઝનલ મેજિસ્ટ્રેટશ્રીએ એક અખબારી યાદીમાં જણાવ્યુ છે.