અમરેલી શહેરમાં એક પરિવારના ઘરના બેડરૂમમાં વર્ષોથી વિશાળ પીપળાનું વૃક્ષ આસ્થાનું અનોખું કેન્દ્ર બન્યું

અમરેલી શહેરમાં એક પરિવારના ઘરના બેડરૂમમાં વર્ષોથી વિશાળ પીપળાનું વૃક્ષ આસ્થાનું અનોખું કેન્દ્ર બન્યું છે. પરિવારના જણાવ્યા મુજબ આ પીપળો આશરે 100થી 150 વર્ષ જૂનો છે. સામાન્ય રીતે પીપળાનું વૃક્ષ બહાર અથવા મંદિરોની આસપાસ જોવા મળે છે, પરંતુ અમરેલીમાં આ પરિવારના ઘરની અંદર જ વિશાળ પીપળો જોવા મળતા લોકોમાં પણ કુતૂહલ જોવા મળી રહ્યું છે.

રેખા મેહુલ પરીખ જણાવે છે કે, આ પીપળાની સૌથી મોટી વિશેષતા એ છે કે તેના વિવિધ ભાગોમાં ધાર્મિક સ્વરૂપો જેવી આકૃતિઓ જોવા મળે છે. પરિવારના મતે પીપળામાં બ્રહ્મા, વિષ્ણુ અને મહેશ ત્રણેયના દર્શન થાય છે. પીપળાના મૂળના ભાગમાં બ્રહ્માનું સ્વરૂપ જોવા મળતું હોવાનો પરિવારનો દાવો છે, જ્યારે થડની અંદર જમણી સૂંઢવાળા ગણપતિનું સ્વરૂપ પણ દેખાય છે.

પરિવારનું કહેવું છે કે પીપળાના થડનો આકાર એટલો વિશાળ છે કે તેને હાથથી સંપૂર્ણ રીતે ઘેરી શકાય તેમ નથી. વૃક્ષના અલગ-અલગ ભાગોમાં કુદરતી રીતે બનેલી રચનાઓને તેઓ ધાર્મિક આસ્થા સાથે જોડે છે. પીપળાની છાલનો રંગ પણ પીળાશ પડતો હોવાનું જણાવવામાં આવે છે.

આ પીપળાને ભાલકા તીર્થ સાથે જોડાયેલી પરંપરાગત માન્યતા સાથે પણ પરિવાર જોડે છે. પરિવારના જણાવ્યા મુજબ કેટલાક વિદ્વાનો દ્વારા ભાલકા તીર્થના પીપળા સાથે આ પીપળાના વંશને જોડાયેલી વાત કરવામાં આવી હોવાનું કહેવાય છે. જોકે, આ બાબત ઐતિહાસિક રીતે પ્રમાણિત છે કે નહીં તે અંગે અલગથી સંશોધન જરૂરી છે.

હિંદુ ધર્મમાં પીપળાના વૃક્ષનું વિશેષ ધાર્મિક મહત્વ છે. શ્રીમદ્ ભગવદ્ ગીતાના દસમા અધ્યાયના 26મા શ્લોકમાં ભગવાન શ્રીકૃષ્ણ દ્વારા “વૃક્ષોમાં હું પીપળો છું” એવો ઉલ્લેખ કરવામાં આવ્યો છે. આ શ્લોકને કારણે પણ પીપળાને ધાર્મિક દૃષ્ટિએ મહત્વપૂર્ણ માનવામાં આવે છે.

આ વૃક્ષની બીજી એક અનોખી વિશેષતા તેના પાંદડાં હોવાનું પરિવાર જણાવે છે. સામાન્ય પીપળાના પાંદડાંની સરખામણીએ આ પીપળાના પાનની કિનારી કરકરી પ્રકારની જોવા મળે છે. પરિવારના મતે આ લક્ષણ તેને અન્ય પીપળાના વૃક્ષોથી અલગ બનાવે છે.

આમ, અમરેલીના આ ઘરમાં આવેલો વિશાળ પીપળો માત્ર એક વૃક્ષ નહીં પરંતુ પરિવારની શ્રદ્ધા, પરંપરા અને કુદરતી રચનાઓ સાથે જોડાયેલી અનોખી કહાની બની ગયો છે. વૃક્ષની ઉંમર, વંશ અને ધાર્મિક આકારો અંગેના દાવાઓ પરિવારની માન્યતા પર આધારિત છે.