વિદ્યાર્થીઓમાં સારા વિચારો અને ઉત્તમ સંસ્કારોની પરિપૂર્તિ થાય એવા ઉમદા હેતુથી તળાજાના નીલકંઠ ગુરુકુલમ્ ખાતે નવરાત્રિ પર્વ નિમિત્તે ‘શક્તિ આરાધના મહોત્સવ’ની ભક્તિમય માહોલમાં ઉજવણી કરવામાં આવી હતી.આ મહોત્સવ અંતર્ગત માતાજીની સ્થાપના કરવામાં આવી હતી તેમજ વિદ્યાર્થીઓ દ્વારા માતાજીની મહાઆરતી ઉતારીને આરાધના કરવામાં આવી હતી અને ત્યારબાદ પરંપરાગત વેશભૂષા સાથે રાસ-ગરબાનું સુંદર આયોજન કરવામાં આવ્યું હતું.
નવરાત્રિના પાવન દિવસોમાં યોજાયેલા આ મહોત્સવમાં વિદ્યાર્થીઓએ પરંપરાગત વેશભૂષા ધારણ કરી ઉત્સાહપૂર્વક રાસ-ગરબામાં ભાગ લીધો હતો.ડીજેના તાલે વિદ્યાર્થીઓ અને ગુરુકુલમ્ના ટ્રસ્ટીઓ અને સ્ટાફ ગરબે ઘૂમ્યા હતા.સમગ્ર પરિસર માતાજીની ભક્તિ, સંગીત અને આનંદના માહોલથી ગુંજી ઊઠ્યું હતું.
આ આયોજન દ્વારા વિદ્યાર્થીઓમાં ભારતીય સંસ્કૃતિ, ધાર્મિક પરંપરા અને તહેવારોના મહત્ત્વ પ્રત્યે જાગૃતિ કેળવવાનો સુંદર પ્રયાસ કરવામાં આવ્યો હતો. ભક્તિ અને સંસ્કૃતિના સંગમ સમાન આ મહોત્સવ ઉત્સાહભેર ઉજવાયો હતો.
આ મહોત્સવને સફળ બનાવવા સંસ્થાના ટ્રસ્ટીઓ, સંચાલકો, આચાર્ય, શિક્ષક સ્ટાફ અને વિદ્યાર્થીઓએ ભારે જહેમત ઉઠાવી હતી.
