ભારતીય સંસ્કૃતિના મહાપર્વ દિવાળીની સાવરકુંડલા શહેરીજનો દ્વારા ભારે ઉત્સાહ અને ઉમંગથી ઉજવણી કરવામાં આવી હતી. દીપોત્સવના આ પર્વમાં લોકોએ રાત્રિના સમયે ભારે આતિશબાજી કરી ધૂમ ફટાકડા ફોડ્યા હતા. દિવાળીની રાત્રિના આનંદ અને રોનક બાદ, પરોઢિયું થતાં જ સાવરકુંડલા નગરપાલિકાના સફાઈ કર્મચારીઓ અને સુપરવાઇઝરોની સમગ્ર ટીમ સક્રિય બની ગઈ હતી.
શહેરમાં ફટાકડાના વેસ્ટ જેવા કે કાગળ, ખોખા, અને કોકડા સહિતનો કચરો રસ્તાઓ પર ફેલાયેલો હતો. આ કચરાને વહેલી સવારે જ દૂર કરવા માટે સફાઈ ટીમ દ્વારા ખાસ ઝુંબેશ શરૂ કરવામાં આવી હતી. કચરાગાડી પણ વહેલી સવારથી જ કાર્યરત હોય નગરપાલિકાના કર્મચારીઓની મહેનતથી શહેરના મોટાભાગના મુખ્ય માર્ગો પરથી કચરો સંપૂર્ણપણે સાફ કરી દેવાયો હતો અને રસ્તાઓ ચોખ્ખાચણાક બનાવી દેવામાં આવ્યા હતા.
જો આ સફાઈ કર્મચારીઓ દિલ દઈને પોતાની ફરજ ન બજાવે, તો શહેરની સ્વચ્છતા જળવાવી અશક્ય બની જાય છે. આમ, સાવરકુંડલા શહેરને સ્વચ્છ અને સુઘડ રાખવામાં આ સફાઈ કર્મચારીઓનું યોગદાન અત્યંત નોંધપાત્ર ગણાય છે. મોટેભાગે તેમના આ મહત્વપૂર્ણ કાર્યને બિરદાવવા માટે પણ સૌએ સમય ફાળવવો જોઈએ. આ સંદર્ભે આપડું કુંડલા પાંધીસર ડીઝીટલ ન્યૂઝ ન્યૂઝ પોર્ટલ આ તમામ સફાઈ કર્મચારીઓ અને તેમની સમગ્ર ટીમના આ નિષ્ઠાવાન કાર્યને હૃદયપૂર્વક બિરદાવે છે. સાથે જ, તમામ કર્મચારીઓને નૂતન વર્ષ નિમિત્તે હાર્દિક શુભકામનાઓ પાઠવવાની સાથે તેમનું આરોગ્ય ઉત્તમ રહે અને તેઓ આર્થિક પ્રગતિ કરે તેવી શુભાશિષ પાઠવે છે.
