સાવરકુંડલા શહેરમાં આવેલ ગાંધી ચોક વિસ્તારમાં આવેલ ૧૨૨ વર્ષ પ્રાચીન મહાલક્ષ્મી માતાજીનું મંદિર દિવાળીના પર્વ નિમિત્તે સંપૂર્ણપણે ભક્તિમય માહોલમાં રંગાઈ ગયું હતું. ધનતેરસના પવિત્ર અવસરે મંદિર ખાતે માતાજીને પરંપરાગત રીતે છપ્પન ભોગ ધરાવવામાં આવ્યા હતા, જેના દિવ્ય દર્શન કરી મોટી સંખ્યામાં ભાવિક ભક્તોએ ધન્યતા અનુભવી હતી.
આ પ્રાચીન મંદિરમાં વર્ષોથી ધનતેરસના દિવસે માતાજીને છપ્પન ભોગ ધરાવવાની પરંપરા નિષ્ઠાપૂર્વક જળવાઈ રહી છે. આ વિશેષ પ્રસંગે માતાજીનો શણગાર પણ ખૂબ જ આકર્ષક અને ભવ્ય રહ્યો હતો. આ ઉપરાંત, દિવાળીના પવિત્ર દિવસે માતાજીની ૧૦૦૮ કમળનાં પુષ્પો દ્વારા વિશેષ પૂજા-અર્ચના કરવામાં આવે છે. તહેવારો દરમિયાન યોજાતા આ ધાર્મિક આયોજનોમાં શહેર અને આસપાસના વિસ્તારોમાંથી મોટી સંખ્યામાં શ્રદ્ધાળુઓ ઉપસ્થિત રહી આશીર્વાદ મેળવે છે.
મંદિરના પ્રમુખ શાસ્ત્રી દીપકભાઈ ત્રિવેદીના માર્ગદર્શન હેઠળ આ ધાર્મિક પરંપરાઓ વર્ષોથી શ્રદ્ધા અને ભક્તિભાવ સાથે અવિરત જળવાઈ રહી છે, જે સાવરકુંડલાના ધાર્મિક વાતાવરણમાં સકારાત્મક ઉર્જાનો સંચાર કરે છે.
