ઈપણ રાજકીય પક્ષ કે જૂથબંધી વગર તટસ્થ રહીને લોકહિત અર્થે નાગરિક બેંકનું ઉમેદવારી ફોર્મ ભરતા ‘પત્રકાર પાંધીસર’

શ્રી સાવરકુંડલા નાગરિક સહકારી બેંક લિમિટેડની ડિરેક્ટર મંડળની ચૂંટણીનો સત્તાવાર કાર્યક્રમ શરૂ થતાં જ ઉમેદવારી નોંધાવવાનો દોર શરૂ થયો છે. સાવરકુંડલાના જાણીતા નિવૃત્ત શિક્ષક અને નિષ્ઠાવાન પત્રકાર શ્રી બીપીનભાઇ પાંધી (પાંધીસર) એ આજે કોઈપણ રાજકીય પક્ષ કે આંતરિક જૂથબંધીમાં જોડાયા વગર, સંપૂર્ણ નિષ્પક્ષ અને સ્વતંત્ર ઉમેદવાર તરીકે પોતાનું ઉમેદવારી ફોર્મ ભરીને બેંકમાં સબમિટ કર્યું છે.

શ્રી બીપીનભાઇ પાંધી (પત્રકાર પાંધીસર) એ દીર્ઘકાળ સુધી શિક્ષણ ક્ષેત્રે બાળકોને જ્ઞાન આપ્યા બાદ, નિવૃત્તિ પછી પત્રકારત્વના માધ્યમથી સાવરકુંડલા શહેર અને સમગ્ર તાલુકાના પ્રજાકીય પ્રશ્નો, રસ્તા, પાણી, વીજળી અને વહીવટી ધાંધિયા સામે સતત અવાજ ઉઠાવી જનતાના અવાજને વાચા આપી છે.

ઉમેદવારી ફોર્મ ભર્યા બાદ પોતાની પ્રાથમિકતાઓ સ્પષ્ટ કરતા શ્રી બીપીનભાઇ પાંધી (પાંધીસર) એ જણાવ્યું હતું કે, “હું કોઈ પક્ષ, પેનલ કે જૂથના બેનર હેઠળ નહીં, પરંતુ માત્ર ને માત્ર બેંકના સભાસદો અને સ્થાનિક નાગરિકોના હિત માટે ચૂંટણી લડી રહ્યો છું. સાવરકુંડલા નાગરિક સહકારી બેંક એ સભાસદોના પરસેવાની કમાણીનું કેન્દ્ર છે. બેંકના વહીવટમાં સંપૂર્ણ પારદર્શકતા (Transparency) લાવવી, સભાસદોને તેમના હક્કો અને નફો યોગ્ય રીતે મળે તે જોવું અને બેંકને આજના ડિજિટલ યુગ સાથે કદમ મિલાવીને સંપૂર્ણ આધુનિક (Modernize) બનાવવી એ મારો મુખ્ય લક્ષ્યાંક છે.”

તેમણે વધુમાં ઉમેર્યું હતું કે, “એક શિક્ષક તરીકે મેં હંમેશાં નૈતિક મૂલ્યો જાળવ્યા છે અને પત્રકાર તરીકે સતત પ્રજાની સેવા કરી છે. બેંકના ડિરેક્ટર તરીકે ચૂંટાઈને આવ્યા બાદ સ્થાનિક વેપારીઓને સરળ ધિરાણ મળે, ગ્રાહકોને ઝડપી ડિજિટલ બેંકિંગ સુવિધાઓ ઉપલબ્ધ થાય અને બેંકનો વહીવટ પક્ષપાત વગર ચાલે તે માટે હું કટિબદ્ધ રહીશ.”

કોઈપણ આંતરિક જૂથબંધીથી પર રહીને માત્ર લોકહિત અને બેંકના વિકાસના સરાહનીય હેતુ સાથે ચૂંટણી મેદાનમાં ઊતરેલા ‘પત્રકાર પાંધીસર’ ની ઉમેદવારીથી બેંકના સભાસદો, નાના વેપારીઓ અને શિક્ષિત વર્ગમાં ભારે આવકાર અને ઉત્સાહ જોવા મળી રહ્યો છે.