અમરેલી જિલ્લાના બાગાયત ખાતા દ્વારા વર્ષ ૨૦૨૬-૨૭ માટે બાગાયતી પાકોના વાવેતર વિસ્તાર વધારવા, રાઈઝોમેટિક (આદુ, હળદર) પાકોને પ્રોત્સાહન આપવા તથા ફળપાકોમાં ફિલ્ડ કવર થકી ગુણવત્તાયુક્ત ઉત્પાદન મેળવવા જેવી વિવિધ યોજનાઓ મંજૂર કરવામાં આવી છે. આ યોજનાઓનો લાભ મેળવવા માટે ખેડૂતોને નવીન ‘આઈ-ખેડૂત પોર્ટલ ૨.૦’ મારફતે તા. ૧૫ નવેમ્બર, ૨૦૨૬ સુધી ઓનલાઈન અરજી કરવા અનુરોધ કરવામાં આવે છે.
લાભ મેળવવા ઇચ્છુક બાગાયત ખેડૂતોએ પોર્ટલ પર ઓનલાઈન અરજી કરવાની રહેશે. ચાલુ વર્ષ ૨૦૨૬-૨૭થી નવીન આઈ-ખેડૂત પોર્ટલ ૨.૦ પર નોંધણી કરાવનાર તેમજ નવા નોંધણી કરાવનારા ખેડૂતોએ આધાર ઓથેન્ટિકેશન ફરજિયાત કરાવવાનું રહેશે. ત્યારબાદ જ તેઓ ઓનલાઈન અરજી કરી શકશે.
અરજીમાં જણાવ્યા મુજબના જરૂરી દસ્તાવેજો અપલોડ કરી અરજી કન્ફર્મ કર્યા બાદ તેની પ્રિન્ટ લઈ ખેડૂતોએ પોતાની પાસે રાખવાની રહેશે.
યોજનાની મંજૂરી મળ્યા બાદ ક્લેઇમ સબમિટ કરતી વખતે જરૂરી સાધનિક પુરાવા સાથે અરજીની નકલ રજૂ કરવાની રહેશે.
વધુ માહિતી માટે નાયબ બાગાયત નિયામકશ્રીની કચેરી, સરદાર ચોક, ચક્કરગઢ રોડ, અમરેલીનો સંપર્ક કરવા એક યાદીમાં જણાવાયું છે.
