અમરેલી જિલ્લાના વિકાસ પથ પર વધુ એક સિદ્ધિ ઉમેરતા, અમરેલી-નાના આંકડીયા-ચિતલ માઈનર બ્રિજ (જગુ પુલ)નું રાજ્યના કાયદો અને ઊર્જા રાજ્યમંત્રી શ્રી કૌશિકભાઈ વેકરીયાના હસ્તે લોકાર્પણ કરવામાં આવ્યું છે. અંદાજિત રૂ. ૪.૫ કરોડની માતબર રકમના ખર્ચે નવનિર્મિત થયેલા આ માઈનર બ્રિજ (જગુ પુલ)ના કારણે સ્થાનિકો તેમજ આ માર્ગ પરથી પસાર થતા હજારો વાહનચાલકો માટે પરિવહન વધુ સરળ, સલામત અને સુગમ બનશે. આ પુલ કાર્યરત થવાથી આસપાસના ગ્રામ્ય વિસ્તારોના આર્થિક અને સામાજિક વિકાસને નવી ગતિ મળશે.
રાજ્ય સરકાર દ્વારા છેવાડાના વિસ્તારો સુધી રોડ-રસ્તા અને બ્રિજનું મજબૂત નેટવર્ક ઊભું કરીને આંતરમાળખાકીય સુવિધાઓનો વ્યાપ સતત વધારવામાં આવી રહ્યો છે. આ નવનિર્મિત જગુ પુલના માધ્યમથી હવે ચોમાસા દરમિયાન વાહન વ્યવહાર ખોરવાઈ જવાની કે પાણી ભરાઈ જવાની સ્થાનિકોની વર્ષો જૂની સમસ્યાનો કાયમી ઉકેલ આવ્યો છે. સુદ્રઢ માર્ગો અને આધુનિક પુલની આ નવીન સુવિધા ગ્રામીણ ક્ષેત્રોમાં શિક્ષણ, આરોગ્ય અને રોજગારીની સેવાઓને ઝડપી બનાવશે તથા વાહનચાલકોના સમય અને ઇંધણની પણ મોટી બચત કરશે.
આ લોકાર્પણ પ્રસંગે રાજ્યમંત્રીશ્રીની સાથે જિલ્લા પંચાયતના અગ્રણી હોદ્દેદાર શ્રી ડેનીભાઈ પરમાર, અમર ડેરીના ચેરમેન શ્રી અશ્વિનભાઈ સાવલીયા તેમજ અમરેલીના અગ્રણી શ્રી મેહુલભાઈ ધોરાજીયા ઉપરાંત કાર્યક્રમમાં જિલ્લાના વિવિધ સ્થાનિક અગ્રણીશ્રીઓ, પદાધિકારીશ્રીઓ અને માર્ગ અને મકાન વિભાગ (રાજ્ય)ના વરિષ્ઠ અધિકારી શ્રી રાઠોડ, શ્રી દેસાઈ સહિતના વહીવટી અધિકારીશ્રીઓ અને મોટી સંખ્યામાં સ્થાનિક ગ્રામજનો ઉપસ્થિત રહ્યા હતા.
