ભાવનગર જિલ્લામાં જાહેર સુરક્ષા, કાયદો અને વ્યવસ્થા જાળવવા તેમજ નાગરિકોના જીવન અને સંપત્તિની સુરક્ષા
સુનિશ્ચિત કરવાના હેતુથી અધિક જિલ્લા મેજિસ્ટ્રેટશ્રી એન.ડી. ગોવાણીએ મળેલી સત્તાની રૂએ ભાવનગર જિલ્લાના
નિયત કરાયેલાં સ્થળોએ CCTV કેમેરા સિસ્ટમ સ્થાપિત કરવાનું ફરજિયાત કરતું જાહેરનામું પ્રસિદ્ધ કર્યું છે.
જાહેરનામા અનુસાર, જિલ્લાના તમામ બેંકો, ગેર બેન્કીંગ સંસ્થાઓ, આંગડિયા પેઢીઓ, જ્વેલરી શો-રૂમ, પેટ્રોલ પંપ,
ગેસ સ્ટેશનો, હોટલ, રિસોર્ટ, ગેસ્ટ હાઉસ, રેસ્ટોરન્ટ, ગરબા ક્લાસીસ, ધર્મશાળાઓ, શોપિંગ મોલ, કોમર્શિયલ
કોમ્પ્લેક્સ, સિનેમા હોલ, મલ્ટિપ્લેક્સ, શૈક્ષણિક સંસ્થાઓ, હોસ્ટેલ, ખાનગી વેરહાઉસ અને ગોડાઉન ખાતે CCTV
કેમેરાનું ઇન્સટોલેશન ફરજીયાત કરવાનું રહેશે.
CCTV કેમેરા એવી રીતે ગોઠવવાના રહેશે કે જેથી પ્રવેશ અને બહાર નીકળવાના દ્વાર, રિસેપ્શન, લોબી, પાર્કિંગ
વિસ્તાર, બેઝમેન્ટ સહિત અંદરના અને બહારના તમામ મહત્ત્વના વિસ્તારો આવરી શકાય. જાહેર સ્થળોએ આવેલા
એકમોએ જાહેર જગ્યા તથા રસ્તાની બાજુનો વિસ્તાર પણ કેમેરામાં આવરી લેવાનો રહેશે. કોઈપણ સ્થળે દેખરેખ
વિનાનો વિસ્તાર (બ્લાઇન્ડ સ્પોટ) ન રહે તેની તકેદારી રાખવા તેમજ કેમેરાનું ફૂટેજ સારી ગુણવત્તા અને રિઝોલ્યુશન
ધરાવતું હોવું જરૂરી છે.
વધુમાં, તમામ CCTV કેમેરાનું ઓછામાં ઓછા ૧૫ દિવસનું બેકઅપ જાળવવાનું રહેશે. DVR સુરક્ષિત જગ્યાએ
રાખવાના રહેશે તથા કેમેરા ઇન્સ્ટોલ કરતી વખતે વ્યક્તિગત ગોપનીયતાનું ધ્યાન રાખવાનું રહેશે. પોલીસ દ્વારા
ફૂટેજની માંગણી કરવામાં આવે ત્યારે તે તાત્કાલિક ઉપલબ્ધ કરાવવાનું રહેશે. CCTV ફૂટેજમાં ફેરફાર, સંપાદન કે
નાશ કરવો કાયદેસર ગુનો ગણાશે.
જાહેરનામામાં કેમેરા યોગ્ય એંગલ અને ઊંચાઈએ લગાવવા, ચોક્કસ તારીખ અને સમય અંગેનું સ્ટેમ્પિંગ દર્શાવતાં
રાખવા, કેમેરાનું ફાઉન્ડેશન મજબૂત હોવાની ખાતરી કરવા તેમજ શક્ય હોય ત્યાં નાઇટ વિઝન કેમેરાનો ઉપયોગ
કરવાની પણ સૂચના આપવામાં આવી છે.
આ જાહેરનામું સમગ્ર ભાવનગર જિલ્લા વિસ્તારમાં આવેલ તમામ શહેરો/ગામોના મકાનમાલિકોને લાગુ પડશે. આ
જાહેરનામું પ્રસિદ્ધ થયાની તારીખથી ૬૦ દિવસ સુધી અમલમાં રહેશે.
જાહેરનામાનો ભંગ કરનાર વ્યક્તિ ભારતીય ન્યાય સંહિતા-૨૦૨૩ની કલમ-૨૨૩ મુજબ શિક્ષાને પાત્ર થશે.
જાહેરનામાના અમલ અને ભંગ બદલ કાયદેસરની કાર્યવાહી કરવા હેડ કોન્સ્ટેબલથી નીચેના ન હોય તેવા પોલીસ
અધિકારીને અધિકૃત કરવામાં આવ્યા છે.
