મતદારયાદી ખાસ સઘન સુધારણા કાર્યક્રમ અંગે અમરેલી જિલ્લા ચૂંટણી અધિકારીશ્રીની રાજકીય પક્ષોના પ્રતિનિધિઓ સાથે બેઠક યોજાઈ

ભારતના ચૂંટણી પંચ, નવી દિલ્હીના તા.૨૭.૧૦.૨૦૨૫ના પત્રથી તા.૦૧.૦૧.૨૦૨૬ની લાયકાતની તારીખના સંદર્ભમાં મતદારયાદી ખાસ સઘન સુધારણા કાર્યક્રમ-૨૦૨૬ જાહેર કરવામાં આવ્યો છે. જેના અનુસંધાને બુધવારે અમરેલી જિલ્લા ચૂંટણી અધિકારીશ્રી અને જિલ્લા કલેક્ટરશ્રીની રાજકીય પક્ષોના પ્રતિનિધિશ્રીઓ સાથે બેઠક યોજાઈ હતી.

આ બેઠકમાં ઉપસ્થિત રાજકીય પક્ષોના પ્રતિનિધિશ્રીઓને સમગ્ર કાર્યક્રમ વિશે માહિતી આપવામાં આવી હતી. જિલ્લાના તમામ મતદારોની ખરાઈ તા. ૦૪.૧૧.૨૦૨૫થી બુથ લેવલ ઓફિસર દ્વારા શરૂ થઈ છે. સને-૨૦૦૨ની મતદારયાદીનાં સંદર્ભમાં થઈ રહેલા આ કાર્યક્રમમાં મતદારો (https://voters.eci.gov.in/) પરથી અગાઉના સઘન સુધારણા કાર્યક્રમ-૨૦૦૨માં પોતાનું નામ ચકાસી શકશે.

બુથ લેવલ અધિકારી દ્વારા તમામ મતદારોનાં ઘેર જઈને Enumeration Formનું વિતરણ કરી રહ્યા છે તથા ફોર્મ ભરવા જરૂરી માર્ગદર્શન આપશે. આ અંગે જિલ્લા કક્ષાએ ૧૯૫૦ હેલ્પલાઈન નંબર કાર્યરત છે. જે મતદારોના ઈન્યુમરેશન ફોર્મ પૂર્ણ વિગતો સાથે ભરાઈ ગયા છે તેઓ પોતાના સંબંધિત બુથના બીએલઓને ફોર્મ પરત આપી શકશે. 

આગામી તા. ૧૫.૧૧.૨૦૨૫ નવેમ્બર, ૧૬.૧૧.૨૦૨૫, ૨૨.૧૧.૨૦૨૫ અને ૨૩.૧૧.૨૦૨૫ નવેમ્બરના રોજ સવારે ૯.૦૦થી ૧.૦૦ કલાક સુધી BLOના તેમના મતદાન મથક પર હાજર રહેવાના હોવાથી આ સમયગાળા દરમિયાન તમામ મતદારો BLOની મદદથી મેપિંગ/લિન્કિંગ કરાવી શકશે તથા ફોર્મ ભરવા માર્ગદર્શન મેળવી શકશે. જેની તમામ મતદારોને BLAને મારફત માહિતી પૂરી પાડવા માટે અનુરોધ કરવામાં આવ્યો હતો. 

મતદારો BLOનો ફોનથી સંપર્ક કરવા માટે Voters.eci.gov.in પરથી “Book a call BLO”નો વિકલ્પ ઉપયોગ કરી શકાશે.

આ બેઠકમાં રાજકીય પક્ષોના પ્રતિનિધિશ્રીઓ, નાયબ જિલ્લા ચૂંટણી અધિકારીશ્રી દેસાઈ તેમજ જિલ્લા ચૂંટણી તંત્રના કર્મયોગીઓ ઉપસ્થિત રહ્યા હતા.