ભાવનગર જિલ્લામાં સરકારી માન્ય જમીન માપણીની કામગીરી માટે લાયસન્સી સર્વેયર તરીકે નોંધણી કરાવવા
ઇચ્છુક અને જરૂરી લાયકાત ધરાવતા ઉમેદવારો પાસેથી અરજીઓ મંગાવવામાં આવી છે.
લાયકાત ધરાવતા ઉમેદવારોને જરૂરી તાલીમ પૂર્ણ કર્યા બાદ જિલ્લા કલેક્ટરશ્રી દ્વારા સત્તાવાર નોંધણી પ્રમાણપત્ર
(લાયસન્સ) આપવામાં આવશે.
આ નોંધણી માટે ઉમેદવાર સિવિલ એન્જિનિયરિંગમાં ડિપ્લોમા અથવા સિવિલ એન્જિનિયરિંગમાં સ્નાતકની ડિગ્રી
ધરાવતા હોવા જોઈએ. આ ઉપરાંત, આઈ.ટી.આઈ. (સર્વેયર)નો કોર્સ પાસ કરેલા ઉમેદવારો પણ અરજી કરી શકશે.
જમીન દફતર ખાતામાં સર્વેયર સંવર્ગથી ઉતરતી ન હોય તેવી કોઈપણ જગ્યા પર ૧૦ વર્ષ કે તેથી વધુ સેવા
બજાવી નિવૃત્ત થયેલા અધિકારી/કર્મચારીઓ પણ અરજી કરી શકશે. આવા નિવૃત્ત ઉમેદવારો શારીરિક રીતે સક્ષમ
હોવા જોઈએ અને તેમની ઉંમર ૬૨ વર્ષથી વધુ ન હોવી જોઈએ.
ડિપ્લોમા, સ્નાતક અને આઈ.ટી.આઈ. (સર્વેયર)ની લાયકાત ધરાવતા ઉમેદવારોની વયમર્યાદા ૧૮થી ૫૦ વર્ષની
રહેશે. તમામ ઉમેદવારોને કમ્પ્યુટરને લગતા સર્વે વિષયક પ્રોગ્રામોની જાણકારી હોવી જરૂરી છે.
લાયકાત ધરાવતા ઉમેદવારોએ પોતાની શૈક્ષણિક લાયકાત તથા ઓળખના અસલ અને પ્રમાણિત દસ્તાવેજો સાથે
તા. ૧૬ નવેમ્બર, ૨૦૨૬થી તા. ૨૬ નવેમ્બર, ૨૦૨૬ સુધી સવારે ૧૦:૩૦થી સાંજે ૦૬:૧૦ વાગ્યા દરમિયાન અરજી
કરવાની રહેશે.
અરજી નાયબ નિયામક, જમીન દફતર કચેરી, જી-૧૨, બહુમાળી ભવન, બસ સ્ટેશન પાછળ, ભાવનગર ખાતે રૂબરૂમાં
કરવાની રહેશે.
