દિવાળીના પાવન પર્વ નિમિત્તે સમાજના છેવાડાના વિસ્તારોમાં વસતા આર્થિક રીતે પછાત અને જરૂરિયાતમંદ પરિવારોના ચહેરા પર ખુશી લાવવાના ઉમદા હેતુથી સામાજિક સેવા સંસ્થાન શ્રી બચુભાઈ જીવરાજભાઈ સ્મારક, સાવરકુંડલા દ્વારા અનાજની કીટનું વિતરણ કરવામાં આવ્યું હતું.
આ કીટમાં ઘઉંનો લોટ, તેલ, ચણાનો લોટ, મગનો લોટ, ગોળ, ખાંડ, ચોખા, દાળ સહિતની વિવિધ જીવનજરૂરી ચીજવસ્તુઓનો સમાવેશ કરવામાં આવ્યો હતો.
સંસ્થાના આ સેવાકીય કાર્યથી જરૂરિયાતમંદ પરિવારોને દિવાળીના તહેવારની ઉજવણીમાં આર્થિક સહાય મળી રહે તેવો સુંદર પ્રયાસ કરવામાં આવ્યો હતો. તહેવારોની ખુશીઓ સમાજના દરેક વર્ગ સુધી પહોંચે અને કોઈપણ પરિવાર તહેવારની ખુશીઓથી વંચિત ન રહે તેવા આશય સાથે આ સેવાકાર્ય હાથ ધરવામાં આવ્યું હતું.
આ સેવાકીય પ્રવૃત્તિમાં ટ્રસ્ટના ટ્રસ્ટી વિશાલ વ્યાસ, માધવ વ્યાસ, હિતેષભાઈ મકવાણા, જિતેનભાઈ હેલૈયા સહિતના આગેવાનો જોડાયા હતા. સંસ્થાના આ માનવતાવાદી અભિગમને સૌએ બિરદાવ્યો હતો.
