ચૂંટણી તંત્ર દ્વારા વિવિધ કામગીરીની પૂર્વ તૈયારીઓના ભાગરુપે બેઠક યોજવામાં આવી

વિધાનસભા સામાન્ય ચૂંટણી-૨૦૨૨ દરમિયાન જિલ્લામાં તા.૧ ડિસેમ્બર, ૨૦૨૨ને ગુરુવારના રોજ મતદાન થશે. જિલ્લા ચૂંટણી તંત્ર દ્વારા ચૂંટણીલક્ષી વિવિધ કામગીરીની પૂર્વ તૈયારીઓના ભાગરુપે જનરલ ઓબ્ઝર્વર શ્રી અભિનવ ચંદ્રા, શ્રી બાલાચંદ્ર એસ.એન, શ્રી સૂરજકુમાર,  પોલીસ ઓબ્ઝર્વર શ્રી જી.શિવાકુમાર જિલ્લા ચૂંટણી અધિકારી અને કલેકટરશ્રી ગૌરાંગ મકવાણાના અધ્યક્ષ સ્થાને અમરેલી જિલ્લા સેવા સદન ખાતે બેઠક મળી હતી.

ચૂંટણી પંચના નિયત નિર્દેશો મુજબ, મતદાન પૂર્વેના ૭૨ કલાક પહેલા કરવાની વિશેષ કામગીરી અને તેના માટે કરવામાં આવેલી તૈયારીઓ વિશે ઓબ્ઝર્વરશ્રીઓ અને જિલ્લા ચૂંટણી અધિકારીશ્રી દ્વારા તમામ હાજર ઉમેદવારશ્રીઓ, ઉમેદવારશ્રીના ચૂંટણી એજન્ટ સાથે  ચૂંટણીલક્ષી બાબતોની જરુરી ચર્ચાઓ કરી ઘટતું કરવા સૂચનાઓ આપવામાં આવી હતી. ઓબ્ઝર્વરશ્રીઓએ જણાવ્યુ હતુ કે, ઉમેદવારો કે નાગરિકોને જો કોઈ ફરિયાદ હોય તો સંબંધિત પ્રાંત વિસ્તારના ચૂંટણી અધિકારીશ્રી અથવા તો ટોલ ફ્રી નંબર ૧૮૦૦ ૨૩૩ ૨૮૯૨  અથવા ટોલ ફ્રી નંબર ૧૯૫૦ સંપર્ક કરી શકે છે.

ચૂંટણી પ્રચારમાં જોડાયેલા પ્રચારકો જેમનું નામ સંબંધિત વિસ્તારની મતદારયાદીમાં ન હોય તેમને છેલ્લા ૪૮ કલાક દરમિયાન મતવિસ્તારને છોડી દેવા માટે અનુરોધ કરવામાં આવ્યો હતો. તમામ હાજર ઉમેદવારશ્રીઓ, ઉમેદવારશ્રીના ચૂંટણી એજન્ટશ્રીઓને તેમના મતદાન એજન્ટશ્રીઓને યોગ્ય રીતે તાલીમબદ્ધ કરી અને મતદાનના દિવસે સવારે મતદાન પહેલાં મોકપોલ દરમિયાન હાજર રહેવા માટે જણાવવામાં આવ્યું હતું. મતદાનના છેલ્લા ૭૨ કલાક દરમિયાન કોઈ પણ સરકારી જગ્યાઓ જેવી કે ઈલેક્ટ્રીક પોલ, સરકારી કચેરીઓ કે અન્ય જગ્યાઓ પર ઉમેદવારશ્રીઓ દ્વારા પોતાના પ્રચારનું કોઈ પણ પ્રકારનું સાહિત્ય ન લગાડવામાં આવે તેની ખાસ તકેદારી લેવા ઓબ્ઝર્વરશ્રીઓ દ્વારા સૂચના આપવામાં આવી હતી. આજની બેઠકમાં ઉમેદવારશ્રીઓને તથા તેમના ચૂંટણી એજન્ટશ્રીઓને ઈ.વી.એમ.નું વહન કરતા વાહનો વિશે પણ માહિતી આપવામાં આવી હતી.

ઈ.વી.એમ. વહન કરતા તમામ વાહનોમાં જી.પી.એસ. લગાડવામાં આવશે અને તેની વિગતો સંબંધિત ચૂંટણી અધિકારીશ્રીઓ દ્વારા ઉમેદવારશ્રીઓને પૂરી પાડવામાં આવશે. આ બેઠકમાં હાજર તમામ સભ્યશ્રીઓ, અધિકારીશ્રીઓને એબસન્ટી મતદારો, ચૂંટણી ફરજ પરના કર્મચારીશ્રીઓ, અધિકારીશ્રીઓના પોસ્ટલ બેલેટથી થયેલા મતદાન અંગેની વિગતો આપવામાં આવી હતી. આ ઉપરાંત ખર્ચ નિયંત્રણ ફરિયાદ અંગેના ટોલ ફ્રી નંબર ૧૮૦૦ ૨૩૩ ૨૮૯૨  પર આવેલી ફરિયાદો અને તેના નિવારણ અંગેની માહિતી આપવામાં આવી હતી.

આ ઉપરાંત આ બેઠકમાં  સેવા મતદાર, ચૂંટણી ફરજ પરના કર્મચારીઓ અને ચૂંટણીલક્ષી તેમની ફરજ, ચૂંટણીલક્ષી કામગીરી વહેંચણી, સ્ટ્રોંગ રુમ, મત ગણતરી સહિતની બાબતો પર ચર્ચા અને સૂચનો આ બેઠકમાં કરવામાં આવ્યા હતા. આ બેઠકમાં ખર્ચ નોડલ અધિકારી દિનેશ ગુરવ, જિલ્લામાં ચૂંટણી ફરજ પરના નિયુક્ત થયેલા સર્વ ઓબ્ઝર્વસશ્રીઓ અને ચૂંટણી ફરજ પરના અધિકારી – કર્મચારીઓ અને ઉમેદવારોના ચૂંટણી એજન્ટ સહિતના ઉપસ્થિત રહ્યા હતા.