ભાજપ શાસિત અમરેલી નગરપાલિકામાં ઐતિહાસિક નિર્ણય કરી

શહેરમાં છેલ્લાં સતર વર્ષથી પાલિકાની કરોડો રૂપિયાની જમીન ઉપર દબાણ કરેલ આઠ જેટલાં શખ્સો સામે લેન્ડ ગ્રેબીંગની ફરીયાદ કરવા હાથ ધરેલ કાર્યવાહીથી દબાણકર્તાઓમાં ભારે ફફડાટ ફેલાયેલ હતો. સને.૧૯૯૮ માં ફક્ત જમીન વપરાશ માટે સાત વર્ષનાં થયેલાં કરારનો ઉલાળીયો કરી કાચા-પાકા બાંધકામો ખડકી દઈ દબાણકર્તાઓ સામે પાલિકા દ્વારા લાલ આંખ કરવામાં આવતાં ભારે ફફડાટ સાથે શહેરભરમાં ચકચાર જામેલ હતી.પ્રાપ્ત વિગત મુજબ અમરેલી શહેરનાં હાર્દસમા લાઈબ્રેરી ચોકમાં આવેલ ખુલ્લી જમીન સને.૧૯૯૮ માં શહેરનાં રજાકભાઈ અલીભાઈ કુરેશી, ઈસુફભાઈ વલીભાઈ મોગલ, શબ્બીરબિન હાદીભાઈ તમીમી સહિતને અનુક્રમે ૩૦–ચો.મી., ૬૪–ચો.મી. તેમજ ૩૦–ચો.મી. જમીન નગરપાલિકા દ્વારા સાત વર્ષનાં ભાડા કરારે આપવામાં આવેલ હતી. આ જમીન સને ૨૦૦૪ સુધી જ ભાડા કરાર મુજબ ફાળવવામાં આવેલ હોવા છતાં પણ આ શખ્સોએ જમીન નગરપાલિકાને પરત કરવાનાં બદલે કાચા-પાકા બાંધકામો કરી દબાણ કરેલ હતું. આ દબાણની કરોડો રૂપિયાની કિંમતની જમીન ખાલી કરાવવામાં આવતી ન હોવાની ફરીયાદો નગરપાલિકાનાં સત્તાધિશો કારોબારી ચેરમેનશ્રી સુરેશભાઈ શેખવાને મળેલ હતી. જેમાં ઉપરોક્ત ત્રણ શખ્સો ઉપરાંત શહેરનાં ગઢની રાંગની દિવાલ, સંતોષી માતાનાં મંદિર પાસે, મસ્જીદે તકવાની સામે ફરીદાબેન હનિફભાઈ, સતારભાઈ સુલેમાનભાઈ, હાજીશા હસનશા ફકીર અને હનિફભાઈ આમદભાઈ સહિતનાઓએ બિનઅધિકૃત ઓરડીઓ બનાવી સરકારી જમીન ઉપર કરેલ દબાણ હટાવવા પાલિકા દ્વારા નોટીસ આપવા છતાં પણ નોટીસને પણ ગણકારવામાં ન આવતાં ભાજપ શાસિત પાલિકા દ્વારા પાલિકાનાં ઈતિહાસમાં સૌ પ્રથમવાર આવા તત્વો સામે લેન્ડ ગ્રેબીંગ હેઠળ ફરીયાદ કરવા કાર્યવાહી હાથ ધરી દબાણકર્તાઓ સામે સતર વર્ષ બાદ નગરપાલિકા દ્વારા ભરવામાં આવેલાં પગલાં અંગે નગરપાલિકાનાં કારોબારી ચેરમેનશ્રી સુરેશભાઈ શેખવાએ જણાવેલ હતું કે, શહેરમાં ગઢની રાંગ, પાણી દરવાજા, ફુલારા ચોક, સાતમી બારી, બાજીશા દરવાજા, સોમનાથ મંદિર સહિતનાં વિસ્તારોમાંથી આવેલ લોક ફરીયાદોનાં આધારે આવા બિનઅધિકૃત દબાણકર્તાઓ સામે કાનુનીરાહે પગલાં ભરવા કારોબારીમાં તા.૦૧/૦૮/૨૦૨૩ નાં રોજ ઠરાવ કરવામાં આવેલ હતો કે આ વિસ્તારનાં તમામ દબાણકર્તાઓ સામે લેન્ડ ગ્રેબીંગ ફરીયાદ દાખલ કરવા અધિકાર આપી કાર્યવાહી હાથ ધરવામાં આવેલ છે.