આણંદ કૃષિ યુનિવર્સિટી દ્વારા પંજીકરણ કરવામાં આવેલી ગાયની નવી પ્રજાતિ ‘ડગરી’ માટે કુલપતિ પ્રમાણપત્ર એનાયત કરાયું

કેન્દ્રીય કૃષિ મંત્રી નરેન્દ્રસિંહ તોમરની અધ્યક્ષતામાં ભારતીય કૃષિ અનુસંધાન કેન્દ્ર, નવી દિલ્હી ખાતે તાજેતરમાં જ પશુઓની જાતિ નોંધણી માટે પ્રમાણપત્ર એનાયત કરવાનો સમારોહ યોજાયો હતો. આ રાષ્ટ્રીય સમારોહમાં ગાય ,બકરી, ભેંસ,ગધેડા,ઘેટાં,બતક, ભૂંડ,સહિત પશુઓની ૨૫ પ્રજાતિઓને પ્રમાણપત્ર આપવામાં આવ્યું હતું.જેમાં ગુજરાતની આણંદ કૃષિ યુનિવર્સિટી દ્વારા પંજીકરણ કરવામાં આવેલી ગાયની નવી પ્રજાતિ “ડગરી” માટે યુનિવર્સિટીના કુલપતિ ડો.કે.બી.કથીરિયાને રાષ્ટ્રીય પશુ આનુવંશિક સંસાધન બ્યુરો(દ્ગમ્છય્ઇ)-કરનાલ દ્વારા પ્રમાણપત્ર એનાયત કરવામાં આવ્યું હતું.

ગુજરાતની યશકલગીમાં વધુ એક પીંછું ઉમેરાતા રાજ્યના કૃષિ, પશુપાલન અને ગૌસંવર્ધન મંત્રી રાઘવજીભાઈ પટેલે યુનિવર્સિટીના કુલપતિ, અધિકારીઓ, વૈજ્ઞાનિકો અને કર્મચારીઓની સરાહના કરી અભિનંદન પાઠવ્યા હતા. આ પ્રસંગે કૃષિ મંત્રીએ કહ્યું હતું કે, ગાયની નવી ઓલાદને માન્યતા મળવાથી હવે તેની જાળવણી કરવી ખૂબ જ જરૂરી બની જાય છે. આ માટે નવું ઉચ્ચ ગુણવત્તા ધરાવતું ધણ (નર અને માદા પશુઓ) ઊભું કરીને તેમાંથી ગાયો તેમજ સાંઢને કૃત્રિમ વીર્યદાન અથવા કુદરતી રીતે સંવર્ધનમાં ઉપયોગ કરી શકાય. જેથી ભવિષ્યમાં ડગરી ગાયની ઓલાદમાં સુધારો થવાથી દૂધ ઉત્પાદનની ક્ષમતામાં પણ વધારો થઈ શકે અને સારી ગુણવત્તાવાળા બળદો તેમજ સાંઢ પણ મળી શકે.

તેમણે ઉમેર્યું હતું કે, ખાસ કરીને આ ઓલાદ ધરાવતા વિસ્તારમાં બીજી ઓલાદના સાંઢ સાથે સંવર્ધન અથવા કૃત્રિમ વીર્યદાન ન કરવામાં આવે તેવી વ્યવસ્થા ભવિષ્યમાં સત્વરે ગોઠવવી ખાસ જરૂરી બની જાય છે. જેથી ગાયની નવી “ડગરી” ઓલાદની જાળવણી તેની જનીનીક શુધ્ધતા જળવાઈ રહે. અત્રે ઉલ્લેખનીય છે કે, આ સમારોહમાં દેશના ૧૭ રાજ્યોમાંથી વર્ષ ૨૦૨૦, ૨૦૨૧ અને ૨૦૨૨માં નોંધાયેલ નવી પશુધન જાતિના અરજદારોને પ્રમાણપત્રો આપવામાં આવ્યા હતા. જેમાં ગાયની ૧૦, ભેંસની ૪, બકરીની ૩, ભૂંડની ૫ તેમજ ઘેટાં, ગધેડા અને બતકની એક-એક ઓલાદનો સમાવેશ કરવામાં આવ્યો હતો.