જામનગરમાં પોલીસ બંદોબસ્ત માંથી આવતા પોલીસ કર્મીનું ગોંડલ નજીક અકસ્માતમાં મોત

૭ વર્ષના પુત્રએ પિતાની છત્રછાયા ગુમાવતા પરિવારમાં કલ્પાંત છવાયો હાલમાં ગુજરાતના જામનગરમાં એકઠો થયો હતો દુનિયાભરનો જમાવડો. જેનું કારણ હતું અંબાણી પરિવારનો કાર્યક્રમ. દેશના જાણીતા ઉદ્યોગપતિ મુકેશ અંબાણીના પુત્ર અનંત અંબાણીના પ્રી-વેડિંગ સેરેમનીને પગલે ચુસ્ત પોલીસ બંદોબસ્ત ગોઠવાયો હતો. ત્યારે કાર્યક્રમ પુરો થતાં પોલીસ પણ રાહતનો શ્વાસ લઈને ઘરે પરત ફરી રહી હતી. એવામાં જામનગરથી જ સામે આવ્યાં માઠા સમાચાર. ઉલ્લેખનીય છેકે, જામનગર ખાતે અંબાણી પરિવારના પ્રિ-વેડિંગ સેરેમનીના કાર્યક્રમમાં બંદોબસ્ત પૂર્ણ કરી ઘરે પરત ફરતા ગોંડલ પાસે હિટ એન્ડ રનના બનાવમાં પોલીસમેન વિનોદભાઈ લાલકિયાનું કમકમાટીભર્યું મોત નીપજ્યું હતું. ઉંમવાડા રોડ પર બાઈક પર સવાર કોન્સ્ટેબલને અજાણ્યા વાહનનો ચાલક ઠોકરે લઈ ફરાર થઇ ગયો હતો. જેથી પોલીસ બેડામાં શોક છવાયો છે. વિનોદભાઈ વર્ષ ૨૦૧૧થી પોલીસ વિભાગમાં ફરજ બજાવતા,

ગોંડલ બાદ હાલ શાપર પોલીસ મથકમાં ફરજ હતી. ૭ વર્ષના પુત્રએ પિતાની છત્રછાયા ગુમાવતા પરિવારમાં કલ્પાંત છવાયો છે. આ અંગે અજાણ્યા વાહન ચાલક સામે ગુનો નોંધાયો છે. ફરિયાદમાં મૃતકના ભાઈ સંજયભાઈ ઉર્ફે ચંદુ હકુભાઈ લાલકીયા (ઉં.વ.૪૩)એ જણાવ્યું કે, હું મારા મૂળ ગામ બેટાવડ નવા પ્લોટ જુની પંચાયત સામે, તાલુકો ગોંડલ ખાતે રહું છું. ગામમાં મારી ૨૫ વીઘા ખેતીની જમીન આવી છે તેમાં ખેતી કામ કરું છું. ગઈકાલ તા.૪/૩/૨૦૨૪ ના રોજ હું જમીને મારા ઘરે સૂતો હતો ત્યારે આશરે રાત્રે પોણા બારેક વાગ્યે મારા નાના ભાઈ વિનોદભાઈના પત્ની શીતલબેનનો મને ફોન આવેલ અને વાત કરેલ કે, તમારા ભાઈનું એક્સિડન્ટ થયેલ છે

અને તેને ગોંડલ સરકારી દવાખાને લઈ ગયેલ છે. જેથી હું તથા મારા કાકાનો દીકરો મિલન લાલકીયા અમે બંને જણા મારી વેગેનઆર ગાડીમાં બેટાવડથી નીકળી ગોંડલ સરકારી દવાખાને આવતા મને ખબર ૫ડેલ કે, મારો નાનો ભાઈ વિનોદ ગુજરી ગયેલ છે. અને મેં તેની લાશ જાેયેલ તો તેને જમણા પગે લાગેલ હતું અને જમણો પગ બે જગ્યાએથી ભાંગી ગયેલ હતો. શરીરે નાની મોટી ઈજા થઈ હતી અને મને વાતો વાતથી જાણવા મળેલ કે, વિનોદ ઉંમવાડા ગામે પ્રસંગમાં ગયેલ હતો અને તેનું હીરો હોન્ડા સ્પ્લેન્ડર મોટરસાયકલ નંબર.જીજે-૦૩-જે બી -૫૫૫૦ લઈને ગોંડલ ઘરે આવતો હતો.

ત્યારે રસ્તામાં આશરે પોણા અગીયારેક વાગ્યાના અરસામાં સુવર્ણભૂમિ રેસિડેન્સી પાસે પહોંચતા કોઈ અજાણ્યા વાહન ચાલકે મારા ભાઈને મોટરસાયકલ સાથે અડફેટે લઈ એક્સિડન્ટ કરી શરીરે ગંભીર ઈજા પહોંચાડતા મારા ભાઈનું મોત નીપજેલ. મારા ભાઈ વિનોદભાઈ હાલ ગોંડલ સીટી પોલીસ લાઈનમાં રહેતા હતા. તેમને સંતાનમાં ૭ વર્ષનો દીકરો છે. ગોંડલ બી. ડિવિઝન પોલીસે ગુનો નોંધી અજાણ્યા વાહન ચાલકની શોધખોળ હાથ ધરી છે.