ગુજરાત વિધાનસભાની ચૂંટણી પહેલા પ્રશાંત કિશોરની ટીમ ગુજરાત પહોંચી, BJP ઓફિસ ‘કમલમ’ પાસે લીધો ફ્લેટ

ગુજરાતમાં ડિસેમ્બર સુધીમાં વિધાનસભાની ચૂંટણી યોજાવાની છે, જેના માટે કોંગ્રેસ પાર્ટીએ પણ તૈયારીઓ શરૂ કરી દીધી છે. આ સાથે ચૂંટણી રણનીતિકાર પ્રશાંત કિશોર (પીકે) કોંગ્રેસમાં જોડાય તેવી ચર્ચા છે. પ્રશાંત કિશોરની ટીમે ગુજરાતમાં પણ પ્રચાર શરૂ કર્યો હોવાની માહિતી મળી રહી છે. એવી પણ ચર્ચા છે કે પીકેની ટીમે ભાજપના મુખ્ય કાર્યાલય ‘કમલમ’ પાસે એક ફ્લેટ ભાડે લીધો છે અને કોંગ્રેસ પાર્ટીએ પણ પીકેની ટીમને ફ્લેટ અને કાર સહિતની ઘણી સુવિધાઓ આપી છે.

ગત વર્ષે પ્રશાંત કિશોર કોંગ્રેસના પૂર્વ અધ્યક્ષ રાહુલ ગાંધીને મળ્યા હતા. જે બાદ તેઓ કોંગ્રેસમાં જોડાય તેવી શક્યતા છે. પાંચ રાજ્યોની વિધાનસભા ચૂંટણીમાં હાર બાદ કોંગ્રેસની હાલત દયનીય બની છે. તેથી જ પીકેની મદદથી કોંગ્રેસે 2024ની લોકસભા ચૂંટણીમાં સ્થાનિક પક્ષો સાથે ચક્રવ્યુહ બનાવવાનું શરૂ કર્યું છે.

ભરતસિંહ સોલંકીએ પી.કે. સાથે મુલાકાત કરી હતી

ગુજરાતમાં કોંગ્રેસની એક પછી એક હાર બાદ 2022ની ચૂંટણી માટે સંગઠનમાં ફેરફાર કરવો જરૂરી હતો. કોંગ્રેસે રાજ્ય વિધાનસભાની ચૂંટણી પહેલા બેઠક શરૂ કરી દીધી હતી. ગત વર્ષે કોંગ્રેસના નેતા ભરતસિંહ સોલંકીએ દિલ્હીમાં ચૂંટણી રણનીતિકાર પ્રશાંત કિશોર સાથે મુલાકાત કરી હતી. ભરત સિંહ અને પ્રશાંત કિશોરની મુલાકાત લગભગ બે કલાક સુધી ચાલી હતી.

ગાંધીનગરમાં કોંગ્રેસના નેતાઓની બેઠક યોજાઈ
અન્ય રાજ્યોની જેમ ગુજરાતમાં પણ કોંગ્રેસની સ્થિતિ સારી નથી. જેના કારણે પાર્ટીએ નવા સંગઠનની રચનાની તૈયારીઓ શરૂ કરી દીધી છે. તે જોતા તાજેતરમાં ગાંધીનગરમાં કોંગ્રેસના ધારાસભ્યો અને વરિષ્ઠ નેતાઓની મહત્વની બેઠક મળી હતી. બેઠકમાં સંગઠનને વધુ મજબુત બનાવવાની સાથે ગુજરાત કોંગ્રેસના પ્રભારી અને પ્રદેશ પ્રમુખ અંગે વહેલી તકે નિર્ણય લેવા પણ ચર્ચા કરવામાં આવી હતી.

સૂત્રો પાસેથી મળેલી માહિતી મુજબ ચૂંટણી રણનીતિકાર પ્રશાંત કિશોર મે મહિના પહેલા કોંગ્રેસમાં જોડાવાની ઔપચારિક જાહેરાત કરી દેશે. થોડા દિવસ પહેલા જ તેઓ રાહુલ ગાંધી અને પ્રિયંકા ગાંધીને મળ્યા હતા. તેમને પાર્ટીમાં મોટું પદ આપવાની પણ તૈયારી ચાલી રહી છે.