આસામમાં આવેલા પૂરથી ૧૬ જિલ્લાઓમાં ૪.૮૮ લાખ લોકો પૂરથી પ્રભાવિત થયા

પૂર્વોત્તર રાજ્ય આસામ ફરી એકવાર પૂરની ઝપેટમાં છે. અત્યાર સુધીમાં લગભગ ૫ લાખ લોકો પ્રભાવિત થયા છે. દરમિયાન, હવામાન વિભાગે ઘણા ભાગોમાં ભારે વરસાદ અને વાવાઝોડાની ચેતવણી આપી છે. આ દરમિયાન ઘણી નદીઓમાં પૂર જાેવા મળી રહ્યુ છે. જાેરહાટના નેમાટીઘાટ પર બ્રહ્મપુત્રા ખતરાના નિશાનથી ઉપર વહી રહી છે. કામરૂપ અને નલબારી જિલ્લામાં પુથિમરી અને પાગલડિયા નદીનું જળસ્તર લાલ નિશાનથી ઉપર છે. આવતીકાલે સાંજ સુધીમાં બ્રહ્મપુત્રાની જળસપાટીમાં ૧૫-૩૦ સેમીનો વધારો થવાની સંભાવના છે. હવામાન વિભાગે ઘણા વિસ્તારોમાં યલો એલર્ટ જાહેર કર્યું છે. આ દરમિયાન લોકોને તેમના ઘરોમાં સતર્ક રહેવાની સલાહ આપવામાં આવી છે. વિભાગે ભારે વરસાદ અને વાવાઝોડાના જાેખમોનો સામનો કરવા માટે તૈયાર રહેવા જણાવ્યું છે. જણાવવામાં આવી રહ્યું છે કે અત્યાર સુધીમાં ૧૬ જિલ્લાઓમાં ૪.૮૮ લાખ લોકો પૂરથી પ્રભાવિત થયા છે. પૂરના કારણે બે લોકોના મોત પણ થયા છે. બાજલી સૌથી વધુ પ્રભાવિત થયું છે, જ્યાં ૨.૬૭ લાખ લોકો પૂરની ઝપેટમાં આવી ગયા છે. આ સિવાય નલબારી અને બરપેટા જિલ્લામાં પણ પૂરથી લોકો ગંભીર રીતે પ્રભાવિત થયા છે. નલબારીમાં લગભગ ૮૦,૦૦૦ અને બારપેટામાં ૭૩,૦૦૦ લોકો અસરગ્રસ્ત છે. આ દરમિયાન લોકોની સુરક્ષા માટે ૧૪૦ રાહત શિબિર કેન્દ્રો બનાવવામાં આવ્યા છે, જ્યાં ૩૫,૦૦૦ લોકોએ આશ્રય લીધો છે. પૂરની અસરને ધ્યાનમાં રાખીને વધુ ૭૫ કેમ્પ સેન્ટર બનાવવામાં આવી રહ્યા છે. હવામાન વિભાગની ચેતવણી વચ્ચે નેશનલ ડિઝાસ્ટર મેનેજમેન્ટ ઓથોરિટી, સ્ટેટ ડિઝાસ્ટર મેનેજમેન્ટ ઓથોરિટી, નાગરિક સંરક્ષણ કર્મચારીઓ અને ગ્રામજનો પણ રાહત કાર્યમાં વહીવટીતંત્રને મદદ કરી રહ્યા છે. છેલ્લા ૨૪ કલાકમાં જાણવા મળ્યું છે કે કોકરાઝાર અને વિશ્વનાથ, દરરંગ જિલ્લામાં અનેક ડેમ તૂટી ગયા છે, જેના કારણે આસપાસના ગામોમાં ખતરો વધી ગયો છે. બારપેટા, કચર, બજાલી, બક્સા, ધુબરી, ગોલપારા, કરીમગંજ, નલબારી અને આસપાસના જિલ્લાઓમાં રસ્તાઓ, પુલ અને માળખાગત સુવિધાઓને અસર થઈ છે. વહીવટીતંત્રે જણાવ્યું કે ધુબરી, કોકરાઝાર, ડિબ્રુગઢ, શિવસાગર, સોનિતપુર, દક્ષિણ સલમારા, ઉદલગુરી અને તામુલપુર, બક્સા, વિશ્વનાથ, બોંગાઈગાંવ, ચિરાંગ જિલ્લામાં ધોવાણ નોંધાયું છે. મીડિયા રિપોર્ટ્‌સ અનુસાર આ દરમિયાન ઘણા ભાગોમાં ભૂસ્ખલન થઈ શકે છે. આવી સ્થિતિમાં લોકોને સાવચેત રહેવા માટે કહેવામાં આવ્યું છે.