પાકિસ્તાનના કરાચીમાં શોપિંગ મોલમાં આગ, ૪ લોકોના મોત

પાકિસ્તાનના કરાચી શહેરમાં બુધવારે સાંજે એક શોપિંગ અને રેસિડેન્શિયલ મોલમાં આગ લાગવાથી ચાર લોકોના મોત થયા હતા અને અન્ય બે ઘાયલ થયા હતા. કરાચીના મેયર મુર્તઝા વહાબે પુષ્ટિ કરી છે કે આયેશા મંઝિલ વિસ્તારમાં સ્થિત ઈમારતમાંથી અત્યાર સુધીમાં ત્રણ સળગેલા મૃતદેહો મળી આવ્યા છે.જાે કે, એક વરિષ્ઠ પોલીસ અધિકારીએ જણાવ્યું કે ચાર મૃતદેહોને સરકારી હોસ્પિટલમાં મોકલવામાં આવ્યા છે, જ્યારે અકસ્માતમાં ઘાયલ થયેલા લોકોને બહાર કાઢવામાં આવ્યા છે. બે લોકો હોસ્પિટલમાં સારવાર હેઠળ છે. ફાયર વિભાગના અધિકારી હુમાયુ ખાને જણાવ્યું હતું કે આગ દેખીતી રીતે ગ્રાઉન્ડ ફ્લોરથી શરૂ થઈ હતી અને ઝડપથી અન્ય ત્રણ માળ સુધી ફેલાઈ ગઈ હતી. ફાયર વિભાગની છ ગાડીઓ આગ ઓલવવામાં વ્યસ્ત છે. અમે ટૂંક સમયમાં આગ પર કાબૂ મેળવી લઈશું..

મીડિયા રિપોર્ટ્‌સ અનુસાર, સિંધ રેસ્ક્યૂ ૧૧૨૨ના ડાયરેક્ટર આબિદ શેખે જણાવ્યું કે આખી બિલ્ડિંગ આગની લપેટમાં આવી ગઈ હતી. બિલ્ડિંગમાં ગ્રાઉન્ડ ફ્લોર, મેઝેનાઇન ફ્લોર અને અન્ય ચાર રહેણાંક માળ હતા. તેમણે કહ્યું કે બચાવ કાર્ય ચાલુ છે. જાેહરાબાદ સ્ટેશન હાઉસ ઓફિસર સુદિરે જણાવ્યું કે ફાયર બ્રિગેડની આઠ ગાડીઓ આગ ઓલવવા માટે કામ કરી રહી છે. આગને અમુક અંશે કાબુમાં લેવામાં આવી છે. ફાયર બ્રિગેડ ઓફિસર હુમાયુ ખાને જણાવ્યું કે આગ નીચેના માળથી ચોથા માળ સુધી ફેલાઈ ગઈ છે. રિપોર્ટ અનુસાર સિંધના ગવર્નર કામરાન ટેસોરીએ આ આગ પર શોક વ્યક્ત કર્યો છે. તેમણે કહ્યું કે આ આગથી ઘણું નુકસાન થશે અને શહેરમાં રહેતા લોકોને તેનો ભોગ બનવું પડશે. તેમણે ભારપૂર્વક જણાવ્યું હતું કે સત્તાવાળાઓ હંમેશા આવી ઘટનાઓ માટે દોષી ઠેરવે છે, જ્યારે લોકોએ તેનો ભોગ બનવું પડે છે. મળતી માહિતી મુજબ, તાજેતરમાં ગુલિસ્તાન-એ-જૌહર વિસ્તારમાં છ માળની ઈમારતમાં લાગેલી ભીષણ આગમાં ૧૧ લોકોના મોત થયાના થોડા દિવસો બાદ જ આ ઘટના બની છે.