યુક્રેન પર રશિયાનો મોટો હુમલો,પોલ્ટાવા શહેરમાં બે બેલેસ્ટિક મિસાઈલ છોડવામાં આવી, ૪૧ લોકોના મોત

યુક્રેનના રાષ્ટ્રપતિ ઝેલેન્સકીએ માહિતી આપી છે કે પોલ્ટાવા શહેરમાં આજે રશિયન હુમલામાં ૪૧ લોકો માર્યા ગયા છે, જ્યારે ૧૮૦ લોકો ઘાયલ હોવાનું કહેવાય છે. ઝેલેન્સકીએ જણાવ્યું છે કે આ હુમલો પૂર્વ ભાગમાં સ્થિત પોલ્ટાવા શહેરમાં કરવામાં આવ્યો હતો. યુક્રેનના રાષ્ટ્રપતિએ કહ્યું છે કે પોલ્ટાવા શહેરમાં એક શૈક્ષણિક સંસ્થા અને હોસ્પિટલ પર ૨ બેલેસ્ટિક મિસાઈલથી હુમલો કરવામાં આવ્યો છે. રશિયા-યુક્રેન યુદ્ધની શરૂઆત બાદ આ સૌથી ઘાતક હુમલો હોવાનું કહેવાય છે. યુક્રેનના રાષ્ટ્રપતિ વોલોડીમિર ઝેલેન્સકીએ તેમની ટેલિગ્રામ ચેનલ દ્વારા કહ્યું છે કે પોલ્ટાવાની મિલિટરી કોલેજમાં હુમલો થયો હતો, જેમાં ઓછામાં ઓછા ૪૧ લોકો માર્યા ગયા હતા. ઝેલેન્સકીએ કહ્યું છે કે તેમણે આ હુમલાની સંપૂર્ણ તપાસ માટે સૂચના આપી છે. ઝેલેન્સકીએ કહ્યું છે કે રશિયન હુમલાખોરોએ આનો માર સહન કરવો પડશે.

તેમણે કહ્યું કે અમે આ યુદ્ધને રોકવાની શક્તિ ધરાવતા વિશ્વના તમામ દેશોને અપીલ કરીએ છીએ કે યુક્રેનને એર ડિફેન્સ સિસ્ટમ અને મિસાઈલની જરૂર છે. લાંબા અંતરની મિસાઈલ જ યુક્રેનને રશિયન હુમલાથી બચાવી શકે છે. તેમણે કહ્યું કે દુર્ભાગ્યવશ વિલંબના દરેક દિવસે વધુને વધુ લોકોનો જીવ લઈ રહ્યો છે. યુક્રેનિયન વાયુસેનાના અધિકારીઓના જણાવ્યા અનુસાર, રશિયા દ્વારા ૩ ઈસ્કેન્ડર બેલેસ્ટિક મિસાઈલ છોડવામાં આવી છે.

આ મિસાઈલ હુમલો રશિયાના કબજા હેઠળના ક્રિમિયા વિસ્તારમાંથી કરવામાં આવ્યો છે. આ સિવાય રશિયાના કુર્સ્ક પ્રદેશમાંથી એક દ્ભર-૫૯/૬૯ મિસાઈલ છોડવામાં આવી હતી જ્યારે કુર્સ્ક અને ક્રિમીઆમાંથી ૩૫ ઈરાની શહીદ ડ્રોન છોડવામાં આવ્યા હતા. યુક્રેનના એર ડિફેન્સે દાવો કર્યો છે કે તેઓએ ૨૭ ડ્રોન તોડી પાડ્યા છે. યુક્રેનના આંતરિક બાબતોના મંત્રીએ માહિતી આપી છે કે ઝાપોરોઝયેમાં એક હોટલ સંકુલ પર રશિયન હુમલામાં ૩૮ વર્ષીય મહિલા અને તેના ૮ વર્ષના પુત્રનું મોત થયું છે. મહિલાના પતિ અને ૧૩ વર્ષની છોકરીને કાટમાળમાંથી બહાર કાઢવામાં આવ્યા હતા પરંતુ બંનેની હાલત નાજુક છે.