એક વિલન રિટર્ન્સ પ્રથમ દિવસે બોક્સ ઓફિસ પર છવાઈ

બોલીવૂડ હાલમાં દક્ષિણની ફિલ્મો સામે મોટો પડકાર ઝિલી રહ્યું છે ત્યારે એક રાહતના સમાચાર આવ્યા છે. ૨૯ જુલાઈના રોજ રિલીઝ થયેલી ફિલ્મ એક વિલન રિટર્ન્સે પ્રથમ દિવસે ગ્રાન્ડ ઓપનિંગ મેળવ્યું છે. જ્હોન અબ્રાહમ, અર્જુન કપૂર, દિશા પાટની અને તારા સુતરિયા સ્ટારર ફિલ્મે પ્રથમ દિવસે એવરેજ સાત કરોડની કમાણી કરી છે. આ સાથે જ એક વિલન રિટર્સન ૨૦૨૨માં આવેલી ફિલ્મોમાં ૭મી ગ્રાન્ડ ઓપનિંગ કરનાર બોલીવૂડ મૂવી રહી છે. ફિલ્મને દર્શકો તેમજ ક્રિટિક્સ તરફથી સારા રિવ્યૂ નથી મળ્યા. એક વિલન રિટર્ન્સ ૨૦૧૪માં રિલીઝ થયેલી ફિલ્મ એક વિલનની સીક્વલ છે.

આ મૂવીએ પ્રથમ દિવસે ૭.૦૫ કરોડની કમાણી કરી હોવાનું નિર્માતાઓએ જણાવ્યું છે. પીવીઆર, આઈનોક્સ અને સિનેપોલિસ દ્વારા આ ફિલ્મને રૂ. ૩.૧૦ કરોડની કમાણી થઈ છે. જ્યારે અન્ય થીયેટર્સથી આ ફિલ્મને રૂ. ૩.૯૫ કરોડનું કલેક્શન થયું હતું. શનિવાર અને રવિવારના આ ફિલ્મને વધુ કમાણીનો લાભ મળી શકે છે અને તેનું કલેક્શન ઊંચું જવાની અપેક્ષા છે. ૨૦૨૨ બોલીવૂડ ફિલ્મો માટે વધુ ખાસ નથી રહ્યું. આંગળીના વેઢે ગણી શકાય તેટલી ફિલ્મો બોક્સ ઓફિસ પર સારો દેખાવ કરી શકી છે જ્યારે બાકીની ફિલ્મોનો ફિયાસ્કો થતાં ઊંઘે માથે પછડાઈ છે.

આ વર્ષે અત્યાર સુધીમાં રિલીઝ ફિલ્મો પૈકી ભૂલ ભુલૈયા ટુનું સૌથી વધુ પ્રથમ દિવસનું રૂ. ૧૩.૫૦ કરોડનું કલેક્શન રહ્યું હતું. બચન્ન પાંડેનું રૂ. ૧૨.૩૦ કરોડ, પૃથ્વીરાજનું રૂ. ૧૦.૫૦ કરોડ, શમશેરાનું રૂ. ૧૦ કરોડ, ગંગુબાઈ કાઠિયાવાડીનું રૂ. ૯.૬૦ કરોડ, જુગજુગ જિયોનું રૂ. ૮ કરોડ જ્યારે એક લિવન રિટર્ન્સનું રૂ.૭.૦૫ કરોડ રહ્યું છે. મોહિત સૂરી દ્વારા ડિરેક્ટ કરાયેલી આ ફિલ્મને સોશિયલ મીડિયામાં સારા રિવ્યુ નથી મળી રહ્યા. દર્શકોની માંગ પર મેકર્સ ખરા નથી ઉતરી શક્યા તેવું જણાય છે. ફિલ્મની વાર્તાથી લઈને એક્ટિંગ અનેક પહેલુ પર એક વિલન રિટર્ન્સ ટ્રોલર્સના નિશાના પર આવી છે. આ ઉપરાંત સ્ટારકાસ્ટને લઈને મીમ્સ પણ વાયરલ થયા છે.